Poxan por 18.000 euros un gravado de Goya que pertencera a Nicolae Ceausescu
A obra formou parte dun agasallo do rei Xoán Carlos I ao ditador romanés a finais dos anos setenta
Un comprador anónimo adquiriu por 18.000 euros o gravado La filiación, de Francisco de Goya, nunha poxa celebrada este martes en Romanía.
A obra pertencía ao ditador comunista Nicolae Ceausescu e forma parte da serie Os caprichos do pintor español.
A casa de poxas que organizou a venda asegura que o gravado foi un agasallo persoal do rei emérito de España, Xoán Carlos I, arredor dos anos 1979 ou 1980.
Confiscación tras a caída da ditadura
O Estado romanés confiscou a peza tras a execución de Ceausescu o 25 de decembro de 1989, durante a revolución que puxo fin á ditadura comunista.
Anos despois, as autoridades devolveron o gravado a un dos herdeiros do ditador, quen decidiu sacalo agora á venda.
Segundo a casa de poxas, trátase dun dos obxectos que decoraban a residencia da familia Ceausescu e que non acabaron no Museo de Historia.
A obra saíu a poxa cun prezo inicial de 7.500 euros.
Alcanzou rapidamente os 18.000 euros mediante unha oferta presentada en liña por un comprador do que non se coñece a identidade.
O gravado está incluído no Fondo Nacional de Patrimonio Cultural Móbil de Romanía, polo que a súa saída do país queda suxeita a condicións específicas.
A casa de poxas indicou que o proceso de venda cumpre a legalidade vixente e confirmou que o actual propietario é un dos herdeiros de Ceausescu.
.png)
