Pontón chama a pelexar por cada voto nas redes sociais e apela ao voto útil no BNG

A voceira nacional do BNG, Ana Pontón, chamou este domingo para pelexar por cada voto nas redes sociais e no territorio con vistas ao 29-N e apelou ao voto útil no seu partido para que Galicia gañe máis peso político en Madrid e ante un bipartidismo que é garantía "de que nada cambie".

"O 29-N imos a por todas a romper os teitos, a dicirlles que fracasan nas súas sondaxes, e vós sodes o noso algoritmo. Necesitamos que deades a batalla no territorio e nas redes", dixo nun acto de precampaña celebrado no Multiúsos Fontes do Sar de Santiago.

Pontón, acompañada polos cabeza de lista ao Congreso das catro provincias galegas e a alcaldesa de Santiago, Goretti Sanmartín, criticou os que eloxian a Galicia, as súas paisaxes e a súa gastronomía pero despois non lles gusta que se reclame un tren de proximidade ou unha AP-9 gratuíta.

Pontón censurou as guerras "doutros" que "pagamos nós" e o gasto militar do Goberno de Pedro Sánchez, no canto de dedicar eses fondos a cuestións como a vivenda ou a mellorar o AVE.

Durante o acto, os candidatos das catro provincias tamén animaron a votar no BNG para conseguir cambios reais en Madrid.

O diñeiro público debe ser para que poida vivir a xente e non para alimentar o "monstro da guerra" cun "indecente" gasto militar, defendeu Carme da Silva (Pontevedra), mentres que Noa Presas (Ourense) chamou a secundar a folga do 11-N e asegurou que a Galicia feminista vai ser "dique de contención" do machismo.

A candidata por Lugo, Olalla Rodil, invitou a buscar un fito histórico similar ao da final da Copa do Rei de 2002, cando o Deportivo derrotou o Real Madrid no Bernabeu o día do seu centenario: "Ningún partido se dá por gañado antes de empezar a xogar".

Néstor Rego (A Coruña) asegura que os nacionalistas cumpriron cos seus compromisos en Madrid e pide a confianza dos electores que se senten decepcionados coas políticas dos partidos estatais de esquerda.