Sánchez quere máis avances sociais e Feijóo, acabar coa "desvergoña do Goberno"
Desde Tarragona, Sánchez pediu unha gran mobilización para manter os avances sociais fronte aos recortes e a ultradereita
Núñez Feijóo sostén que chega a hora de acabar co amiguismo e a corrupción para apostar por profesionais en postos clave
Nun dos bastións electorais do PSOE, en Cataluña, Pedro Sánchez, apelou a unha gran mobilización para frear a involución e os recortes sociais. Referiuse tamén ao accidente de Urda.
"Nós sempre fixemos o mesmo, demos a cara fronte a aqueles que lles deron as costas ás vítimas e lles deron as costas ás súas responsabilidades".
Di Sánchez que España non vai ser o patio traseiro da internacional ultradereitista.
"Trouxeron guerra, trouxeron inflación, trouxeron un elevado custo da vida para a clase traballadora do noso país, trouxeron odio e mentiras".
O candidato do Partido Popular, Núñez Feijóo, elixiu Valladolid, un territorio electoral tamén propicio. Alí lembrou as últimas investigacions da xustiza europea sobre Adif e a seguridade ferroviaria en España.
"Terán que responder ante a xustiza e se roubaron o diñeiro destinado a protexer a seguridade dos espñois terán que saír do poder para entrar no cárcere".
Para Feijóo a esperanza radica en acabar coa "politica lixo", os escándalos e as mentiras do Goberno.
"Métenvos medo coas pensións cando saben perfectamente que as imos revalorizar todos os anos. Todos os anos as imos revalorizar de acordo co IPC".
