Polo menos nove mortos e dez feridos nun tiroteo a un bar de Suráfrica

Polo menos nove persoas morreron e outras dez resultaron feridas este domingo nun tiroteo ocorrido nun bar en Bekkersdal, provincia de Gauteng, ao suroeste de Johannesburgo.

A dirección de Investigacións de delitos graves e violentos de Gauteng xunto coa unidade de rastrexo e detección de delitos da Policía de Suráfrica iniciaron un operativo de busca para dar cunha ducia de sospeitosos.

“Repórtase que uns doce sospeitosos descoñecidos a bordo dunha camioneta branca e un coche prateado abriron fogo contra os clientes da taberna e continuaron disparando ao azar mentres fuxían do lugar”, indicou a Policía nun comunicado.

A portavoz da policía, Brenda Muridili, afirmou que os feridos foron trasladados a diversos centros médicos para recibir atención urxente e que se mobilizaron “todos os recursos necesarios” para atrapar os autores.

“O motivo do tiroteo determinarase mediante a investigación”, engadiu a portavoz aos medios locais.

“Aínda non sabemos o motivo, pero estamos a buscar un Toyota Etios prateado e un Toyota Quantum branco, que foron utilizados polos sospeitosos”, reforzou o comisionado interino de policía de Gauteng, Fred Kekana.

De acordo con datos oficiais, os homicidios son un dos delitos máis frecuentes en Suráfrica, onde se rexistraron 5.727 asasinatos entre xaneiro e marzo deste ano, e entre abril e setembro a media de homicidios foi de 63 por día.

O último tiroteo destas características ocorreu o 6 de decembro, cando unhas once persoas morreron nun bar clandestino dentro dun albergue de Saulsville, no oeste de Pretoria, capital de Suráfrica.