Morren catro persoas nun tiroteo durante unha festa infantil en California
Outras dez persoas quedaron feridas durante o ataque que –sospeitan– puido ser selectivo
Catro persoas morreron e outras dez quedaron feridas nun tiroteo ocorrido durante a celebración dunha festa de aniversario infantil en Stockton, no norte de California (EUA), confirmaron fontes oficiais.
O incidente tivo lugar o sábado pola noite nun restaurante da cidade e a policía, que cre que o tiroteo puido ser "selectivo", busca un sospeitoso.
Entre as vítimas hai menores e adultos, aínda que polo momento non transcenderon máis detalles sobre a identidade das persoas falecidas nin sobre o estado das feridas, trasladadas a hospitais locais.
A oficina do shériff do condado de San Joaquín informou de que o tiroteo ocorreu pouco antes das 18:00 horas e asegurou que a investigación segue en curso.
"Os primeiros indicios suxiren que pode tratarse dun incidente selectivo, e os investigadores están a explorar todas as posibilidades. Os detectives están a traballar activamente para determinar as circunstancias que levaron a esta traxedia", indica nun comunicado en Facebook.
