Soben a doce os falecidos confirmados polo lume en Los Gallardos (Almería); 23 persoas seguen sen localizar

O presidente andaluz Juanma Moreno confirma que son xa 12 as persoas falecidas das que teñen constancia. Díxoo nunha comparecencia pasadaas as 13,30 horas.

As autoridades andaluzas rebaixaran provisionalmente a once o número de persoas falecidas no grave incendio forestal que azouta ao municipio de Los Gallardos (Almería), segundo informou o conselleiro de Presidencia, Sanidade e Emerxencias, Antonio Sanz, quen advertiu de que a cifra segue sendo variable dada a complexidade da xestión da emerxencia sobre o terreo.

Dez dos falecidos son estranxeiros. Catro deles, ao parecer, ían nun coche, todos son estranxeiros e posiblemente británicos polo indicio do volante contrario do vehículo, pero aínda pendentes de identificar. As outras sete persoas mortas ían nun grupo de nove, das que dúas puideron salvarse, segundo desvelou Sanz, que detallou que un deles é de nacionalidade española e o resto poderían ser tamén estranxeiros -belgas ou británicos-. 

 O presidente andaluz Juanma Moreno asegura que 23 persoas non foron ainda localizadas.

Os falecidos localizáronse nunha pedanía do municipio de Bédar (Almería), onde varias das vítimas foron sorprendidas polas chamas no interior dos seus vehículos. Sanz reiterou que se trata dunha traxedia sen precedentes e do incendio de maiores consecuencias ata a data na comunidade autónoma.

O conselleiro fixo un chamamento explícito á calma e a evitar decisións unilaterais de evacuación e insistiu aos veciños na absoluta necesidade de non tomar camiños nin vías de escape que non fosen coordinados e autorizados de xeito expreso polos servizos de emerxencia.

As pescudas iniciais confirman que o desvío por rutas improvisadas no medio da densa fumareda agravou as consecuencias do desaloxo nas primeiras horas do suceso.

"Elixir outro camiño foi unha verdadeira trampa"

"Lamentablemente a decisión de coller por outro camiño que non era o de evacuación e buscar unha saída propia a través dunha rambla realmente foi unha verdadeira trampa escollida polas persoas que finalmente faleceron", engadiu o conselleiro.

Sanz concretou dous escenarios: un con catro persoas de orixe británica mortas nun vehículo e outro con sete mortos que ao parecer estaban a camiñar e buscando unha saída que non era a prevista.

"A situación do incendio é complexa. É un incendio con moitísimo barranco no que non puido entrar maquinaria, no que non hai zonas de acceso. E a topografía é malísima. O flanco dereito é o máis preocupante, o lume pode acabar en zonas de cultivo, e hai un flanco esquerdo moi activo no que aínda non se puido entrar a traballar", explicou Sanz.

"Temos catro feridos máis graves que teñen diferentes tipoloxías de queimaduras e que seguramente terminen sendo trasladados ao Hospital Virxe do Rocío en helicóptero desde o hospital Torrecárdenas, que é onde se trasladaron, e temos catro menos graves. Por tanto, 8 feridos", apuntou o conselleiro.

Foron evacuados os habitantes dos núcleos de Almocáizar, Fuente del Albarico, Los Pinos, La Serena e o Piñeiral de Bédar, alén dos usuarios do complexo turístico Miraflores.  600 persoas tiveron que ser desaloxadas e 193 atópanse reacollidas en distintos albergues.

A rede de transportes e infraestruturas da comarca do Levante almeriense continúa severamente afectadas, De feito este mediodía era cortada de novo a A-7 entre os quilómetros 241 e 219 ante o avance do incendio.

Os primeiros avisos das testemuñas presenciais detallaron que a caída dun cable de tendido eléctrico prendeu a vexetación e que o forte vento propagou as chamas con extrema rapidez cara á masa forestal lindeira. 

A evolución do incendio é favorable na zona oriental pero preocupa a parte oeste

O incendio continúa activo aínda que con evolución favorable na parte oriental, aínda que o vento segue sendo intenso e agora preocupa a zona oeste, máis abrupta, porque as lapas se dirixen cara á poboación do Marchal.

Segundo explicou esta tarde aos xornalistas o responsable do grupo de intervención, David Rodríguez, no posto de mando avanzado instalado en Turre (Almería), o incendio segue activo con ventos de entre 20 e 30 quilómetros por hora sostidos do suroeste e refachos de ata 40.

Aínda que "queda moito traballo", a mellor evolución con respecto a esta mañá está a darse na parte máis oriental, a máis próxima á autovía, onde os especialistas practicaron o que denominan 'lume técnico', que está "a dar resultados" e os traballos están a progresar "moi ben".

A zona máis activa do incendio é a que vai cara á poboación do Marchal, debido á lonxitude das chamas e á maior velocidade do lume, que propicia a súa propagación. Neste flanco, máis cara ao oeste, a orografía é máis complexa e abrupta, "con ramblas moi profundas que provocan carreiras de incendio con moita intensidade".

"Estamos a concentrar alí moitos medios terrestres para avanzar o máximo posible antes de que chegue a noite", sinalou o especialista, quen indicou que preocupa que as chamas se dirixan cara ás poboacións do Marchal.

Preguntado sobre se son optimistas, indicou que "non se trata de optimismo", senón de seguir traballando na extinción vendo o que vai dar a tarde de si e programando de xeito anticipado as tarefas nocturnas.

O responsable do grupo de intervención eludiu precisar se aumentou a superficie arrasada polo lume, estimada esta mañá en 3.150 hectáreas.

A UME aporta 200 militares con 70 vehículos

O operativo de emerxencia conta cun amplo despregamento de 464 efectivos e 124 vehículos, de forma que o Plan Infoca mantén sobre o terreo a 150 bombeiros forestais (21 reténs), 9 camiones autobomba e persoal técnico.

Respecto aos medios aéreos, desde primeira hora da mañá operan 11 aeronaves, con previsión de incrementar o seu número. O Ministerio para a Transición Ecolóxica e o Reto Demográfico (MITECO) ten despregados catro avións FOCA --dos sete que hai en funcionamento-- e un helicóptero MIKE para apoiar a extinción.

Os reis, "profundamente consternados"

Os reis de España mostráronse este venres "profundamente consternados pola traxedia do incendio de Los Gallardos", en Almería, e expresaron o seu pesar ás familias das vítimas e os afectados.

Profundamente consternados por la tragedia del incendio de Los Gallardos.

Expresamos nuestra tristeza y pesar a las familias y seres queridos de las personas fallecidas y hacia todos los afectados.

Trasladamos también nuestro reconocimiento y apoyo a los servicios de…

— Casa de S.M. el Rey (@CasaReal) July 10, 2026

 

 

Os reis trasladan tamén o seu recoñecemento e apoio "aos servizos de emerxencias e a todos os efectivos que, con profesionalidade e compromiso, continúan traballando para facer fronte a esta situación". 

 

O presidente do Goberno, Pedro Sánchez, e o presidente da Xunta de Andalucía, Juanma Moreno, expresaron a súa consternación e dor ante a catástrofe e, como consecuencia da traxedia, a Junta de Andalucía aprazou o acto de toma de posesión dos conselleiros do novo Executivo autonómico, previsto para esta mañá en Sevilla.

Sánchez mantivo unha conversa con Moreno para ofrecerlle toda a colaboración do Goberno español para facer fronte á traxedia.

"Todos os medios materiais e humanos do Gobierno de España están xa despregados para lograr a extinción do incendio forestal de Los Gallardos e a atención ás persoas afectadas", engadiu.

Tamén houbo reacción do presidente do PP. Alberto Núñez Feijóo, lamentou a "terrible" situación que está a provocar o incendio forestal en Los Gallardos, e trasladou o seu pésame ás familias dos once falecidos e "toda a forza" aos veciños que continúan desaloxados.

Tamén desde Galicia

 O presidente da Xunta, Alfonso Rueda; a portavoz nacional do BNG, Ana Pontón, e o portavoz da Executiva do PSdeG, Julio Torrado, trasladaron o seu pesar polos falecementos no incendio orixinado na localidade de Los Gallardos, en Almería.

Nunha mensaxe publicada nas súas redes sociais, o presidente da Xunta amosouse "consternado" pola noticia, tras coñecerse que polo menos 11 persoas faleceron e case unha vintena permanecen desaparecidas.

Consternado por la noticia de los fallecimientos del incendio de Almería.

Desde Galicia enviamos todo nuestro apoyo y cariño al pueblo andaluz en estos momentos tan difíciles.

Y a mi compañero Juanma Moreno: estamos a vuestra disposición para ayudar en lo que esté de nuestra…

— Alfonso Rueda (@AlfonsoRuedaGal) July 10, 2026

 

O Goberno Andaluz decretou tres días de loito oficial polo incendio.