Arquivada a querela presentada por Errejón contra Mouliáa por calumnias
O instrutor considera que a actriz non atribuíu ao exdeputado ningunha conduta delituosa concreta, senón que expuxo "opinións" nas súas redes sociais
Antonio Gutiérrez/Europa Press
O xuíz Arturo Zamarriego acordou o arquivo da querela que presentou o exvoceiro de Sumar Iñigo Errejón contra a actriz Elisa Mouliáa por calumnias.
Segundo adiantou El País, o instrutor considera que a actriz non atribuíu ao exdeputado ningunha conduta delituosa concreta, senón que expuxo "opinións" nas súas redes sociais.
O maxistrado acordou arquivar a investigación que abriu pola querela de Errejón contra Mouliáa por ter dito que el extorsionara testemuñas na causa na que o político está acusado de agredila sexualmente.
O pasado 24 de xuño, Elisa Mouliaá negou ante o xuíz Arturo Zamarriego que quixese calumniar o exportavoz de Sumar Íñigo Errejón.
Á súa saída do Xulgado de Instrución número 9 de Madrid, tras esa declaración ante o xuíz, a actriz manifestou: "Ao fin e ao cabo esta querela é por ter publicado dous tuits nos que acusaba a Errejón de ter amañado a declaración de dúas testemuñas" -na causa pola suposta agresión sexual- "porque nese momento eu pensaba que foi así".
"Vin un vídeo da declaración dunha testemuña dicindo que estivera falando con Errejón e que lle preguntara cal era o plan", engadiu Mouliáa. Non obstante, non recoñeceu que puidese terse confundido.
