Polo menos 21 mortos e 61 feridos tras a explosión dunha pirotecnia na China
A policía detivo o responsable da empresa e investiga as causas do sinistro
O presidente chinés pide que se depuren responsabilidades
Os bombeiros traballan para extinguir o incendio declarado tras a explosión dunha fábrica de fogos artificiais en Hunan (cnsphoto vía REUTERS)
Polo menos 21 persoas morreron e outras 61 quedaron feridas nunha explosión rexistrada nunha fábrica de fogos artificiais na provincia chinesa de Hunan, no centro do país, segundo informou este martes a televisión estatal CCTV.
O estourido produciuse este luns ao redor das 10:43, hora galega, nun taller da empresa Huasheng, dedicada á fabricación e exhibición de fogos artificiais, por causas que están a ser investigadas..
O responsable da empresa foi detido pola policía. Os equipos de rescate, compostos por 480 efectivos, estiveron traballando durante horas tentando verificar o número de vítimas. Os falecidos son polo menos 21. Os feridos foron trasladados a distintos centros hospitalarios.
Dado que o punto da explosión se atopa próximo a dous almacéns de pólvora negra, os equipos de emerxencia evacuaron os residentes próximos e estableceron un perímetro de seguridade para evitar un posible accidente secundario.
O presidente chinés Xi Jinping confía en que os equipos de rescate consigan dar canto antes coas persoas que permanecen aínda desaparecidas e pide que se esclarezan canto antes as causas do suceso e se depuren responsabilidades.
A China rexistra con frecuencia accidentes vinculados á industria pirotécnica: doce persoas morreron o pasado febreiro pola explosión dunha tenda.
