Polémica polo uso da Torre do Reloxo de Betanzos para unha proba deportiva
Dende o Concello aseguran que a Torre do Reloxo non sufriu dano ningún
A oposición cuestiona o uso do patrimonio histórico para estas actividades
A Torre do Reloxo de Betanzos, con case cincocentos anos ás súas costas, lucía o domingo coma sempre, allea á polémica xerada entre a veciñanza. Unha proba deportiva de rapel, que incluía o descenso con cordas de corenta participantes pola fachada do monumento, abriu o debate.
A opinión está dividida. Algunhas persoas condenan o uso dun edificio histórico neste tipo de actividades, outras pensan o contrario e hai quen prefire minimizar a controversia.
A empresa organizadora do evento di que conta cos permisos pertinentes e defende a escolla da torre co fin de darlle visibilidade ao patrimonio histórico da vila. Ademais, asegura que estiveron moi pendentes para evitar danos no monumento, que é de titularidade municipal.
Precisamente, o concello betanceiro cualifica a polémica de artificial.
"A proba que se realizou na torre non é unha actividade invasiva, nin se causou ningún dano á propia torre, e parécenos unha polémica partidista e interesada", defende a alcaldesa de Betanzos, María Barral.
Dende a oposición, tanto o BNG coma o Partido Popular, cuestionan estas actividades no patrimonio histórico. Mentres, dende a Consellería de Cultura atribúen ao Concello a competencia para autorizar ou non este tipo de actuacións.
