O ocupa acusado de matar un compañeiro de piso en Vigo sinala un terceiro residente

Este luns comezou o xuízo contra o home acusado de matar o seu compañeiro de piso ocupado ilegalmente o 17 de xullo de 2023. O primeiro en declarar foi o acusado, que negou os feitos. Revelou, ademais, que cando chegara á vivenda non había ninguén na casa e afirmou que vira un terceiro residente tirar algo e limpar as mans cos seus ouriños. 

A avogada do acusado vai pedir a libre absolución por falta de probas. A defensa trasladou ao xurado "as dúbidas máis que razoables" que presenta o caso, aludindo ás contradicións do terceiro residente e ás condicións físicas do acusado.

Os feitos ocorreron cando a vítima e o acusado volvían das festas de Bouzas e tras unha discusión se separaron para volver coincidir ás portas da vivenda onde, segundo a narración do fiscal, o acusado asestou a vítima catro coiteladas, a última no corazón, resultando nunha lesión incompatible coa vida.

Porén, o acusado, que só respondeu ás preguntas da súa letrada, afirmou que a discusión se producira entre o terceiro convivente e o falecido. Mentres, el permaneceu na praza da Industria e cando chegou a casa, atopouna baleira. 

Máis tarde, refire ter visto ao terceiro convivente tirando un obxecto e limpando as mans cos seus propios ouriños. Segundo o acusado, esta persoa foi a que lle dixo que o falecido fora acoitelado e quen lle pasou o teléfono co número de emerxencias xa marcado para alertar do sucedido.

A Fiscalía pide 20 anos de cadea para o acusado que xa leva case dous anos no cárcere e tamén solicita 60.000 euros de indemnización para a nai da vítima.

O xuízo celebrado na sección quinta da Audiencia de Pontevedra continuará durante toda a semana.