Piden 13 anos de cadea para un veciño de Lugo acusado de abusar dunha filla da súa exparella

Un home de 46 anos está acusado de abusar dunha das fillas da súa exparella. Segundo o escrito da acusación, os feitos sucederon no domicilio familiar, en Lugo, en novembro de 2018, cando a vítima tiña 14 anos.

Aproveitando que a súa nai se encontraba de viaxe, o padrasto deitouse coa rapaza e realizoulle tocamentos nos peitos e na vaxina. A consecuencia do acontecido, durante a ausencia da súa proxenitora a vítima durmiu coa súa irmá máis nova coa porta do cuarto atrancada cun colchón.

Posteriormente, en marzo de 2020, o acusado empuxou a irmá maior da vítima no transcurso dunha discusión cando ela soubo do sucedido. Polo delito de abusos sexuais a unha menor de 16 anos, a fiscalía da Audiencia Provincial de Lugo pide doce anos de cadea, e outros once meses polo delito de maltrato no ámbito familiar.

Ademais, solicita o pagamento dunha indemnización de 15.000 euros polas secuelas e por danos morais. Pola súa parte, a defensa pide a libre absolución.