Persecución, coitelo en man, polo centro da Coruña

Arrancou quente a mañá. Case nin había movemento. Algún negocio aberto, un par de veciños madrugadores e pouco máis.

"Estaba antes das oito da mañá atendendo e chegou unha muller dicíndome que había barullo na praza. Asomamos a cabeza e viñan da entrada do Gadis dous homes, un detrás do outro, e o de atrás cun coitelo", explica unha hostaleira.

Carreira dende a Calle Real, pasando polo mercado de San Agustín e con final na praza de María Pita. O corazón mesmo da cidade. Alí o vocerío escoitouse nos pisos máis altos.

"Empecei a esoitar berros pola ventá e asomeime porque eu vivo en fronte da igrexa de San Jorge, e vin dúas persoas berrando, un ía de branco e o outro de escuro. Uns berros tremendos, un marchou para un lado, o outro berráballe pero cuns insultos gravísimos que non vou repetir", confirma un veciño.

"Estaba tomando o café pola mañá e había un mozo, que ademais me pediu un cigarro e deillo, e despois saíu para a parte de atrás do bar pelexarse con outro ao que xa non vin eu. Colleu unha cadeira do bar e dixo que o outro trouxera un coitelo", coincide outro.

Berros, insultos e algo na man, que segundo uns era un coitelo e para outros un machete. Chove sobre mollado.

"Eu non cheguei a velo, pero a muller dixo que si levaba un coitelo, e despois veu outro mozo e dixo que o outro día neste outro lado da praza houbera outra lea con arma branca. Se son os mesmos, xa non teño nin idea", engade a hostaleira.

En ningún dos casos, o enfrontamento chegou a máis. Neste último, un dos implicados foi identificado. O outro fuxiu.

"Viñeron tres coches da policía municipal, viñeron outros tres da nacional e deberon andar buscando o outro, pero non sei se o atoparon ou non".

"Cando aparquei a moto había catro municipais rodeando un rapaz, que estaba calmado, co móbil na man, 'wasapeando'", confirma un traballador madrugador.

Como pasa nestes casos, ningún dos dous quixo presentar denuncia.