Perde o control e mete o seu coche no estanque de praza de América, en Vigo
Segundo o relato das testemuñas, o home sufriu un mareo e atravesou o xardín da praza ata acabar no estanque
Imaxe nunca vista no centro de Vigo. Un todo terreo sen control entrou na glorieta da praza de América e acabou caendo no estanque dunha das fontes. O coche baixaba pola Gran Vía cando, segundo as testemuñas, acelerou e seguiu recto en vez de bordear a praza. Subiu polo céspede e caeu na auga.
O condutor era un home de 78 anos que, segundo a Policía Local de Vigo, perdeu o sentido. Pensan que, nun acto reflexo, pisou o acelerador e, como o vehículo é automático, seguiu de fronte ata o centro da glorieta. De feito, o motor seguía funcionando e as rodas xirando cando xa estaba dentro da auga e tiveron que apagar o vehículo para rescatar o condutor. Logo, xa consciente, o home foi trasladado en ambulancia a un hospital.
A operación para sacar o coche da fonte complicouse polo seu peso, máis de dúas toneladas. Por momentos, o guindastre inclinábase pero os traballadores deron coa fórmula para levantar o todo terreo.
