Peche temporal dos pubs de Chantada por exceso de ruído

A rúa Castelao e a praza de García Arias son o centro da polémica no concello lugués de Chantada. Concéntranse aquí a maioría dos locais de ocio nocturno, e os veciños relatan que a situación é insufrible.

"Moitos veciños xa marchan nas fins de semana porque non poden durmir".

Foron poñendo denuncias todas as fins de semana, e é que o ruído mesmo deixou secuelas entre varios afectados.

"Eu estou a tratamento por insomnio dende o ano 2014 e hai nenos pequenos a tratamento polos despertares nocturnos".

Agora o Concello acaba de notificarlles o cesamento temporal da actividade a todos os pubs da vila por superar o máximo de ruído permitido, ata que acometan as reformas necesarias.

"Ata que non o vexa non o creo, porque para insonorizar estes locais fai falta moito diñeiro".

"A xuventude ten que divertirse e hai que dinamizar a economía pero non a costa da saúde da xente".

Máis alá da actual notificación de peche temporal dos locais, os veciños sinalan que a instrución xudicial que se leva a cabo despois de anos sen atender as súas denuncias segue adiante co fin de depurar responsabilidades.