O Europeo de Maratón péchase con cinco medallas absolutas para Galicia
O Europeo de Maratón péchase con cinco medallas absolutas para Galicia
Triunfo de Tono Campos (Breogán do Grove) que se impuxo no último esforzo a Manuel Garrido (Kayak Tudense) no C1
Iván Alonso (Olívico) acadou a prata no K1
A parella Campos - Garrido impúxose no C2 con Busto e Miguens na terceira posición
Tono Campos levou o ouro e Diego Garrido a prata no C1 do Europeo de Maratón que se está a celebrar en Silkeborg (Dinamarca). Gran traballo dos dous padexeiros galegos que levaron o peso da proba canda o portugués Sergio Maciel.
Pouco a pouco conseguiron marcar diferenzas e xogáronse todo no esprinte despois de padexar durante máis de dúas horas. O máis forte foi Campos que lle sacou sete segundos a Garrido nese derradeiro esforzo. Por detrás Maciel non puido aguantar o ritmo dos galegos nos últimos cincocentos metros e entrou a 35 segundos.
Tamén chegou ao esprinte final o tudense Iván Alonso (Olívico) pero cedeu no último intre diante de Mads Pedersen. O dinamarqués competía na casa e apoiado polo público atopou o último alento que o levou ao triunfo.
Na xornada do domingo houbo medallas para catro galegos, que chegaron no C-2 masculino. A parella formada por Tono Campos e Manuel Garrido, medallistas xa onte, acadou o ouro, superando logo dos portes aos polacos. Pero é que ao podio subiron tamén Fernando Busto e Diego Míguens para recibir a medalla de bronce.