Cinco medallas con presenza galega no Europeo de Piragüismo

O piragüismo galego demostrou a súa fortaleza cun balance de cinco medallas (un ouro, dúas pratas e dous bronces) no Campionato de Europa de Maratón 2026, disputado en Bascov-Pitesti (Rumanía). Os deportistas dos clubes galegos brillaron en diferentes categorías. 

A medalla de ouro chegou no C2 júnior masculino, onde Álvaro Pedrosa e o cangués Adrián Hermelo, do club de Mar Ría de Aldán-Gandón SA, se proclamaron campións de Europa tras dominar os 15,4 km. A dupla impúxose cun tempo de 1:12:42.20, por diante de Ucrania e Hungría. A final contou ademáis con outra embarcación galega: Miguel Custodia e Roi Dávila, ambos do Club de Piragüismo As Torres-Romería Vikinga de Catoira, que terminaron nunha quinta posición cun tempo de 1:15:51.39.

O caiac deixou dous subcampionatos para Galicia. No K2 sénior masculino, Adrián Martín e o pontevedrés Joaquín Iglesias, do club Piragüismo Rías Baixas-Boiro, rozaron o título ao quedar a só 87 centésimas dos húngaros Erdelyi e Boros, levándose finalmente a medalla de prata.

A segunda prata chegou no K2 júnior masculino, onde o pontevedrés Jaime Escuder e Pau Sánchez, do club Kayak Tudense, foron segundos con 1:33:20.75. O podio completouse cun bronce tamén galego: Os lucenses Iván e Brais Bargados, do Club Piragüismo Cidade de Lugo, que cruzaron a meta en 1:33:27.21.

Tamén se conseguiu metal na canoa. No C2 masculino có tudense, Manuel Garrido Barbosa (Kayak Tudense) e Jaime Duro, do Club Fluvial de Lugo, lograron o bronce cun tempo de 1:26:09.02, nunha proba dominada por Polonia.