Ourense roza os 38 graos e a calor moderarase o venres, pero seguirá en valores altos
Prevense néboas costeiras ao longo do día, máis persistentes no litoral norte e noroeste
As temperaturas non experimentarán cambios importantes, aínda que se espera un moderado descenso no terzo norte
Bañistas na praia da Antena no río Miño, en Ourense (Foto de arquivo/Rosa Veiga/Europa Press)
A masa de aire cálido que afecta a Península deixou en Galicia valores que rozaron os 38 graos, e a previsión apunta que a calor se manterá o venres, aínda que con temperaturas que se moderarán lixeiramente.
Segundo os datos rexistrados por MeteoGalicia, a estación de medición de Leiro (Ourense) chegou a rexistrar 38,1 graos; mentres que a de Ourense capital alcanzou os 38 graos nesta xornada.
Outros puntos da provincia de Ourense, como Arnoia, superaron os 37 graos, e tamén se rexistraron temperaturas elevadas en puntos de Lugo, como Monforte, cunha máxima de 36,2 graos.
No caso das estacións meteorolóxicas situadas a máis de 900 metros de altitude, o récord rexistrouse en Vilariño de Conso (Ourense), cunha máxima de 29,8 graos, seguida moi de preto polos 29,5 graos rexistrados en Navia de Suarna (Lugo).
A xornada deste venres será de inestabilidade atmosférica, con ceo máis aberto na metade oeste e con posibilidade de chuvascos tormentosos, máis probables pola tarde, no interior.
Tamén se prevén néboas costeiras ao longo do día, máis persistentes no litoral norte e noroeste. As temperaturas non experimentarán cambios importantes, aínda que se espera un moderado descenso no terzo norte.
Os termómetros marcarán máximas que oscilarán entre os 36 graos de Ourense e os 21 graos na Coruña. Está activado o aviso amarelo por altas temperaturas para ese venres, na zona do Miño en Ourense, e no centro e montaña da provincia de Lugo, especialmente durante a tarde.
