Veciños do Barrio do Cura, en Vigo, piden que arranxen os danos causados polas obras

En Vigo, as obras do barrio do Cura seguen a ocasionar numerosos problemas aos veciños. Gretas, humidades, ruídos e desfeitas que, segundo denuncian, ninguén asume.

Un auténtico calvario están a vivir moitos por mor das obras. A Mari Luz Camuerga caeulle un moble da cociña que levou por diante a billa e deixouna sen auga unha semana. A muller tivo que asumir a reparación e ninguén se preocupou por ela malia que presentou as queixas correspondentes. 

A casa onde naceu amosa moitos danos estruturais e humidades dende que comezaron as obras da urbanización veciña. Quéixanse das gretas, das vibracións continuas nas súas casas e das escorrentías de terras que mesmo fixeron caer unha gran pedra no patio dunha das casas.

Son moitos os edificios da rúa San Francisco que sofren tamén danos polas obras: inundacións polas escorrentías de terras, gretas, ruídos. Denuncian que ninguén asume os danos nas súas vivendas e que no poden máis. Como Paula Temprano, embarazada da súa primeira filla, que di que aínda esperan que fagan o protocolo de gretas que debería estar xa feito, e que malia as reclamacións, ninguén lles fai caso. 

Os veciños só piden que se fagan cargo dos danos que están a sufrir nos seus edificios e que os deixen vivir.