Os veciños desaloxados en tres aldeas de Lalín polo lume volven ás súas casas
Os veciños desaloxados en tres aldeas de Lalín polo lume volven ás súas casas
O lume queimou 700 hectáreas e quedou a 300 metros das casas
Algúns veciños foron a casas de familiares e outros a hoteis pagados polo Concello
A vida na parroquia de Lebozán vai recuperando o alento aos poucos. As últimas horas foron complicadas polo incendio que empezou no Irixo. Os veciños de Bustelo foron desaloxados. "Eu marchei e non sei que pasou máis. Agora tróuxome o sobriño. Veño de cambiarme. Vin todo isto e dixen: loado sexa Deus", comenta unha veciña.
Nesta aldea viven 10 veciños e varios son octoxenarios. Agora no verán reciben os familiares. Iván vén do País Vasco e estaba facendo o Camiño de Santiago. El quedou na aldea. "Durante dous días todo foi estar nervioso. Case non durmín nada. Déitaste e aos cinco minutos xa te levantas", di.
O incendio queimou 700 hectáreas. A maioría é monte raso. As lapas chegaron a 300 metros das casas. "O aire viña nesa dirección e daba medo! Tivemos a sorte que cambiou de dirección e por iso se salvou a aldea"
Os servizos de extinción revisan que o lume non volva prender nas zonas quentes. De feito, no monte vense varias columnas de fume.