Arrinca a folga en defensa da seguridade ferroviaria, con centos de trens cancelados

Os traballadores ferroviarios están convocados polos sindicatos do sector para secundaren tres xornadas de folga de 24 horas a partir deste luns para esixir "un cambio estrutural na seguridade" do ferrocarril, tras os accidentes mortais de Adamuz (Córdoba) e Gelida (Barcelona).

As organizacións sindicais piden medidas concretas e realistas ante a deterioración da fiabilidade e da calidade do servizo ferroviario, a falta de recursos humanos e materiais, a ausencia de planificación e a externalización de actividades esenciais que afectan directamente o funcionamento diario do ferrocarril público.

A folga está convocada polas organizacións maioritarias -Semaf, CCOO e UXT-, así como CXT, SCF, SF e Alferro para todo o persoal do sector, desde a operación ata o mantemento, a circulación, a atención a bordo e o resto de actividades que sosteñen o servizo público.

Ademais de Adif e todo o grupo Renfe (Viaxeiros, Mercadorías, Enxeñería e Mantemento, Alugueiro de Material Ferroviario e Proxectos internacionais), a convocatoria alcanza os operadores privados Iryo e Ouigo, así como a Serveo, contratista de servizos a bordo, e firmas de transporte de mercadorías e servizos loxísticos como Medway, Captrain, Transervi, Redalsa, Tracción Rail ou Logirail.

Centos de trens cancelados

Cuns servizos mínimos fixados polo Ministerio de Transportes (a resolución non inclúe a Cataluña e País Vasco, que teñen transferidas as competencias) do 73 % en alta velocidade e longa distancia; do 65 %, en media, e do 21 %, en mercadorías, canceláronse centos de trens entre este luns e o mércores 11 de febreiro.

En proximidades, a frecuencia dos trens verase reducida co 75 % de circulacións protexidas polos servizos mínimos en hora punta e do 50 %, no resto do día. Renfe, Ouigo e Iryo cancelaron no conxunto das tres operadoras a circulación de máis de 330 trens de alta velocidade durante as tres xornadas de folga convocada en todo o territorio nacional dos case 1.230 programados.

Dos 995 trens de alta velocidade e longa distancia previstos por Renfe, circularán 723, mentres se suprimen 272, e dos 1.960 de media distancia, farano 1.277 e cancélanse 683.

Ouigo operará 90 dos 110 previstos e cancela 30 e Iryo, 90 dos 124 programados, sen garantir a circulación dos 34 restantes.

Negociacións sen avances suficientes

A pesar da vontade manifestada por ambas as partes de chegar a un acordo, non se alcanzaron aínda solucións concretas ás reivindicacións expostas polos sindicatos nas reunións desta semana co ministro de Transportes, Óscar Puente, acompañado polos presidentes de Adif, Pedro Marco, e Renfe, Álvaro Fernández, e ouros altos cargados do Departamento.

Desde o último encontro dos tres mantidos ata o venres, aos que asistiron Semaf, CCOO e UXT, o ministerio non volveu a convocalos esta fin de semana, durante o cal, con todo, continuaron as negociacións e os contactos sobre temas técnicos, que se seguirán producindo durante os próximos días.

Reivindicacións

Os sindicatos reclaman, entre outras cuestións, cambios inminentes e medidas que preveñan calquera tipo de risco no transporte ferroviario e que estas se acorden coa representación dos traballadores.

UXT pide a participación desta en todos os protocolos e procesos de seguridade, tanto na circulación como no mantemento, e que se retome, por parte de Adif e das operadoras, comisións mixtas de seguridade.

Semaf lamenta que, durante moitos anos, os esforzos centráronse en construír novas liñas de alta velocidade e non a mantelas, polo que solicita que os orzamentos se enfoquen en manter a rede e en ofrecer un servizo de calidade, en lugar dun deteriorado e con limitacións de velocidade.

Segundo CCOO, "non estamos ante un problema de seguridade, pero si ante un de investimento insuficiente, de planificación deficiente e de mantemento, que non responde as necesidades reais do sistema ferroviario".

Para SF, o mantemento nas liñas de alta velocidade "non pode seguir privatizado e en mans das grandes construtoras", polo que todos os contratos externalizados, á chegada da súa vixencia, "teñen que rescindirse e non deben renovarse".

Igualmente, CXT ve urxente reverter a "externalización masiva" de tarefas de mantemento da infraestrutura e do material rodante mediante un "aumento real" dos persoais en todas as empresas do sector para poder prestar un servizo seguro e de calidade. 

Servizos mínimos en Galicia

No caso de Galicia, na liña A Coruña-Ourense, este luns circularán os trens das 05:50 horas, 07:05, 08:12, 11:25, 13:35, 15:10, 17:15 e 21:00. No sentido contrario, funcionarán os das 06:40, 07:50, 09:55, 12:40, 14:25, 15:30, 16:40, 19:00 e 19:50.

Na conexión Vigo Urzaiz-A Coruña sairán trens ás 05:08, 06:34, 08:00, 10:35, 13:40, 14:30, 16:30, 17:40, 18:15, 19:35 e 21:50. Na outra dirección, operarán convois ás 07:00, 08:00, 09:00, 11:06, 12:00, 14:05, 15:00, 17:00, 18:00 e 21:40.

Mentres, na liña rexional Vigo Guixar-A Coruña, funcionarán os trens con saída ás 09:15, 12:31, 15:00 e 20:28. Á inversa, circularán ferrocarrís ás 05:30, 09:39, 12:45, 15:39 e 19:08.

O resto dos servizos mínimos decretados para Galicia e resto de Comunidades Autónomas poden consultarse desde a web de Renfe, onde está dispoñible o decreto do Ministerio de Transportes que os regula.