Os Reis visitan canda as fillas un centro de refuxiados ucraínos en Madrid

Os reis Filipe VI e Letizia visitaban esta tarde un dos catros centros de recepción, acollida e derivación de refuxiados ucraínos en España. O de Pozuelo de Alarcón, na comunidade madrileña, é o primeiro que se abriu e despois habilitáronse outros tres en Barcelona, Málaga e Alacante, todos dependentes do Ministerio de Inclusión, Seguridade Social e Migracións.

Os monarcas, acompañados polas súas fillas, falaron con algúns refuxiados e tiveron a ocasión de coñecer con detalle o dispositivo de recepción dos ucraínos que foxen da guerra. Estímase que España acolleu ata o de agora uns 80.000 refuxiados, a metade dos cales xa lograron o estatus de protección temporal, como informaba recentemente o embaixador de Ucraína en España. Falando en clave estatística, o 37% dos atendidos nestes centros son menores e o 67% dos adultos son mulleres.

Os Reis xa visitaran previamente a célula de crise da Cruz Vermella que se ocupa destes desprazados. Nesta ocasión, a novidade estivo na presenza da princesa Leonor, aproveitando as vacacións da Semana Santa no centro onde cursa o bacharelato en Gales. A princesa de Asturias non participaba nun acto oficial desde o 23 de outubro.

Finalmente, as súas maxestades deixaron constancia do compromiso cos refuxiados e da súa preocupación polo conflito ucraíno.