Os reis presiden o desfile da Festa Nacional no que marcharán 4.400 militares

Os reis Filipe e Letizia presiden este luns o acto principal do Día da Festa Nacional, o tradicional desfile militar polas rúas do centro de Madrid no que participan case 4.400 militares, 144 vehículos, 39 motos, 50 avións e 32 helicópteros.

Os reis estarán acompañados da princesa Leonor, que está a realizar os seus estudos universitarios tras completar a súa formación militar, e da infanta Sofía, que se desprazará desde París, onde este ano cursa o segundo ano de carreira.

Ademais, asistirán o presidente do Gobierno, Pedro Sánchez; a ministra de Defensa, Margarita Robles, e o xefe de Estado Maior da Defensa, almirante xeral Teodoro López Calderón.

Tamén confirmaron a EFE a súa asistencia os ministros do Interior, Fernando Grande-Marlaska; da Presidencia, Xustiza e Relacións coas Cortes, Félix Bolaños; de Asuntos Exteriores, José Manuel Albares; de Educación, Milagros Tolón, e de Ciencia, Diana Morant, mentres que a titular de Mocidade e Infancia, Sira Rego, non acudirá por motivos privados.

Tampouco o presidente de Vox, Santiago Abascal, asistirá ao desfile como xa fixo o ano pasado, xa que estará en Ceuta "cos españois que defenden a fronteira que Pedro Sánchez abandonou", segundo desvelou na súa conta de X.

Si presenciarán a parada militar practicamente todos os presidentes autonómicos, salvo o lehendakari, cuxa ausencia é habitual, ao que este ano se unen a presidenta de Navarra, María Chivite, e o de Andalucía, Juanma Moreno, debido a que se atopa en Bruxelas para asistir ao Comité das Rexións, do que é vicepresidente.

Tamén estará presente o presidente de Ceuta, Juan Jesús Vivas, a pesar da crise migratoria que vive a cidade autónoma, así como do de Melilla, Juan José Imbroda.

O desfile comezará ás 11:00 horas, desde a glorieta de Carlos V, en Atocha ata a praza de Colón nun percorrido de 1.540 metros. Á súa chegada á praza de Cánovas del Castillo, onde estará situada a tribuna real, os reis recibirán honras militases e Filipe VI pasará revista ao Batallón de Honras.

Por primeira vez na súa historia, no desfile participará o Servizo de Gardacostas de Galicia. O corpo civil galego marchará polo centro de Madrid cunha comitiva que inclúe tres vehículos e un tráiler que transportará unha das súas lanchas patrulleiras, amosando o labor de vixilancia e salvamento que realizan no noso litoral.

Posteriormente terá lugar o salto da Patrulla Acrobática de Paracaidismo do Exército do Aire e do Espazo e, tras o izado da bandeira e a homenaxe aos que deron a súa vida por España, a denominada Formación Merlo realizará o sobrevoo neste acto central.

Posteriormente terá lugar o desfile aéreo ao que seguirá o terrestre, no que os asistentes terán a oportunidade de ver por primeira vez neste desfile os blindados 8x8 Dragón do Exército de Terra.

Unha vez finalizada a parada militar, os reis, a princesa de Asturias e a infanta Sofía trasladaranse ao Palacio Real para a tradicional recepción ás altas autoridades do Estado e a representantes do mundo político, económico, social e cultural.