Emmanuel Macron inicia a súa viaxe de Estado a España

O presidente de Francia Emmanuel Macron chega a Madrid este martes 29 de setembro para realizar unha visita de Estado de dous días na que se reunirá con Filipe VI e o xefe do Executivo Pedro Sánchez.

O xefe do Estado francés, que estará acompañado pola súa esposa Brigitte Macron, será recibido no Palacio Real con honras militases polos reis, que posteriormente ofrecerán un xantar no Palacio da Zarzuela.

Na Zarzuela manterán tamén unha reunión os dous xefes de Estado, que volverán atoparse pola noite no Palacio Real, onde os reis de España ofrecerán a tradicional cea en honra de Emmanuel e Brigitte Macron.

Ao día seguinte, mércores, o presidente francés será recibido por Sánchez no Palacio da Moncloa, con quen manterá unha reunión de traballo e tamén xantará. Na xornada, acudirá con Filipe VI a un foro de comercio e investimento de empresarios españois e franceses no Ministerio de Economía.

Macron ten previsto tamén asistir nesta viaxe de Estado a un encontro na Universidade Complutense sobre democracia, mocidade e redes sociais, e visitar o Centro de Satélites da Unión Europea e unha institución francesa de investigación en ciencias humanas e sociais, segundo o Elíseo.

A visita finalizará coa recepción que o presidente francés e a súa esposa ofrecerán aos reis Filipe VI e dona Letizia na Residencia da Embaixada da República Francesa en España.

A viaxe de Macron a España, que se desenvolve no marco das relacións de amizade e cooperación que manteñen ambos os países, foise aprazando por diversos motivos desde que en 2018 Filipe VI o invitou a realizar unha visita de Estado.

A visita prodúcese uns días despois de que o Pleno do Tribunal Constitucional avalase o Tratado de Amizade e Cooperación entre España e Francia, cuestionado polo Senado, que permite a ministros franceses asistir a reunións do Consello de Ministros español e viceversa, ao non ver ningunha contradición coa Constitución.