Publicador de contidos

Publicador de contidos

Macron, recibido con honras polos Reis na primeira visita de Estado dun presidente francés desde 2009

Macron, recibido con honras polos Reis na primeira visita de Estado dun presidente francés desde 2009

Os reis de España, Macron e a súa muller, na cea de gala (José Oliva / Europa Press)
G24.gal 29/09/2026 08:44

O presidente de Francia, Emmanuel Macron, acompañado pola primeira dama, Brigitte, foi recibido con todas as honras polo rei Filipe VI e a raíña Letizia no Palacio Real, no arranque da que é a primeira visita de Estado dun mandatario galo desde 2009.

Os Reis deron a benvida no Praza da Armería a Macron e a súa muller a pé de coche, intercambiando un cálido saúdo. Prevista para as 13:15 horas, a chegada produciuse finalmente ás 14:00 debido a un atraso no voo que traía a Madrid a delegación francesa.

Tras saudar os altos cargos da Casa do Rei, os catro dirixíronse á tribuna de honra, onde puideron escoitar os himnos de Francia e España acompañados por unha salva de 21 canonazos.

A continuación, Filipe VI e Macron recibiron novidades do xefe da forza que rendeu honras na Praza da Armería, antes de saudar o xefe de Estado Maior da Defensa, o almirante xeneral Teodoro López Calderón, e pasar revista ao batallón de honras da Garda Real.

Unha vez completado este acto protocolario, que a Raíña e Brigitte Macron seguiron desde a tribuna de honra mentres conversaban animadamente, tivo lugar o saúdo ás respectivas delegacións que acompañan a ambos os xefes de Estado por parte de cada un deles.

No caso de España, alén do presidente do Goberno, Pedro Sánchez, a quen Macron saudou de forma afectuosa con dous bicos, asistiron o ministro de Asuntos Exteriores, Unión Europea e Cooperación, José Manuel Albares, así como os presidentes de Congreso e Senado, Francina Armengol e Pedro Rollán, do Tribunal Constitucional, Cándido Conde Pumpido, e da Comunidade de Madrid, Isabel Díaz Ayuso.

Para completar a recepción, o rei e Macron volveron á tribuna de honra, onde presenciaron o desfile da Compañía de Honras co que se pechou o acto.

No Pazo da Zarzuela estaba programado un xantar, ao que seguiu un encontro bilateral entre ambos os xefes de Estado. Macron e a primeira dama regresaron esta noite ao Palacio Real, onde os Reis organizaron unha cea de gala na súa honra cun un centenar de invitados e cuxo menú será preparado polo chef Joan Roca.

O Tratado de Amizade, rexeitado no Senado

​​​​​O Senado, coa maioría absoluta do PP, rexeitou este martes o Tratado de Amizade e Cooperación entre España e Francia, despois de que o Tribunal Constitucional dese o seu visto e prace ao texto a semana pasada e faio xusto cando o presidente francés, Emmanuel Macron, está de visita oficial en España.

O tratado foi rexeitado por 142 votos en contra (PP e Vox), unha abstención de UPN e 106 votos a favor do resto da Cámara, entre eles o PSOE, Junts, ERC e EH Bildu. O BNG optou por non votar.

Durante o debate, a senadora do PP Pilar Rojo insistiu en que ao seu partido lle preocupa "o alcance" dos compomisos adquiridos e volveu a mostrar o seu desacordo co artigo do convenio que orixinalmente permitía que membros de ambos os gobernos asistan aos consellos de ministros do outro, artigo que os populares recorreron ao TC, pero que logo foi obxecto dunha matización por parte dos dous países.

Desde o Elíseo trasladaron a semana pasada antes da visita de Estado o seu desexo de que se puidese completar a ratificación do Tratado de Amizade canto antes "para reflectir o nivel da proximidade con España", e púxose de relevo a vontade de Macron de asinar acordos deste tipo con aqueles países cos que Francia ten unha relación máis estreita, como ocorre con Alemaña e Italia, cos que xa hai tratados, ou con Polonia, que se está ultimando.

Axenda do mércores

Ao día seguinte, mércores, o presidente francés será recibido por Sánchez no Palacio da Moncloa, con quen manterá unha reunión de traballo e tamén xantará. Na xornada, acudirá con Filipe VI a un foro de comercio e investimento de empresarios españois e franceses no Ministerio de Economía.

Macron ten previsto tamén asistir nesta viaxe de Estado a un encontro na Universidade Complutense sobre democracia, mocidade e redes sociais, e visitar o Centro de Satélites da Unión Europea e unha institución francesa de investigación en ciencias humanas e sociais, segundo o Elíseo.

A visita finalizará coa recepción que o presidente francés e a súa esposa ofrecerán aos reis Filipe VI e dona Letizia na Residencia da Embaixada da República Francesa en España.

A viaxe de Macron a España, que se desenvolve no marco das relacións de amizade e cooperación que manteñen ambos os países, foise aprazando por diversos motivos desde que en 2018 Filipe VI o invitou a realizar unha visita de Estado.

A visita prodúcese uns días despois de que o Pleno do Tribunal Constitucional avalase o Tratado de Amizade e Cooperación entre España e Francia, cuestionado polo Senado, que permite a ministros franceses asistir a reunións do Consello de Ministros español e viceversa, ao non ver ningunha contradición coa Constitución.

Publicidade
Publicidade
Publicidade
Publicidade