Os prezos dos alugueiros de vivendas soben no último ano en toda Galicia

O alugueiro en Galicia, segundo o informe de evolución dos prezos do portal El idealista ata o 30 de abril, subiu en todas as cidades galegas. A Coruña e Vigo, as dúas urbes máis tensionadas neste aspecto, teñen hoxe alugueiros preto dun 8 % máis caros que hai un ano. Entre marzo e abril deste ano todas as cidades galegas chegaron ao seu prezo máximo histórico.

Segundo a Federación Galega de Empresas Inmobiliarias, a FEGEIN, hoxe Galicia ten o número máis baixo de vivendas en alugamento desde que hai rexistro. 2.950 inmobles dispoñibles para alugar. 

Este stock reducidísimo de vivendas dispoñibles para particulares está vinculado á derivación cara ao alugueiro turístico, especialmente nos centros e núcleos históricos das nosas cidades. 

Pero é Ourense a cidade onde máis subiron os prezos. Fronte a abril de 2022 o aumento é do 10,6 %, o maior de toda a comunidade.  Ourense tamén chegou en febreiro ao prezo da renda máis alta da súa historia, 6,6 euros o metro cadrado. 

Segundo EL idealista a media na Coruña é de 9 euros o metro cadrado. Pero falamos dunha media porque no centro, na cidade vella, en febreiro chegaron aos 10,8 euros o metro cadrado. Un piso de cen metros anda nos 1.080 euros. En Vigo a media en abril foi de 9,5 euros por metro cadrado. Así que un inmoble de 60 metros chegará aos 570 euros. En marzo era de 9,6 euros, o máximo histórico nesta cidade.