Os prezos da ameixa animan o marisqueo na ría de Pontevedra

Despois dos temporais do inverno, os ánimos estaban moi baixos entre os mariscadores. Pero aquí no banco de Lourido, en Poio, decidiron seguir traballando no verán, e non se arrepinten.

"Nesta praia imos tendo algo de marisco, non chove, e ben".

"Este verán esta indo ben, o prezo mantense ben pero hai escaseza".

"Non compensa todo o que pasamos, pero algo anima".

As cotas permitidas son pequenas, pero a que sacan págase ben. A demanda é alta neste tempo de vacacións. E hai quen está disposto a pagar prezos de Noiteboa para poñer este manxar na mesa.

"A xapónica está a uns 20 euros o quilo e a fina, que é moi escasa, pode pagarse desde 50 a 80 euros quilo, e ata case cen", explica Raquel Gómez Lourido, a presidenta da agrupación de marisqueo de San Telmo.

"Polo menos este mes queda algo de marxe para pagar o seguro de autónomos e que quede algo, o mes pasado non quedaron nin 500 euros, así non se pode".

Malia este respiro a situación segue a ser complicada para o sector, que suma unha nova preocupación: a temperatura da auga. 

"Temos medo de que morra, está a auga quentísima".

"De feito a fina igual hai que quitala xa porque chega un momento que non medra máis e pode morrer pola temperatura".

"Polo momento non afectou moito, pero non é boa esta temperatura".

Malia as dificultades, aquí non queren abandonar o raño. Polo menos neste banco, onde, a diferenza do de Combarro, a ameixa aguantou o inverno.