Os novos aceleradores lineais do CHOU melloran a precisión no tratamento de radioterapia

O Hospital de Ourense conta cos aceleradores lineais máis avanzados da rede do Servizo Galego de Saúde. O primeiro está operativo desde o mes de xuño, e neste tempo realizou máis de 2.200 sesións de radioterapia.

O servizo de Radiofísica está realizando agora o calibrado da segunda máquina para que poida estar en servizo a finais de ano. Son traballos de alta precisión que levan tempo.

Estes aceleradores lineais de Ourense son os primeiros que se instalan en Galicia cun sistema de radioterapia guiada por superficie. A xefa do Servizo de Oncoloxía Radioterápica do CHOU, Ana María Rodríguez, explica que permiten "máis precisión nos tratamentos, mellor control do posicionamento dos pacientes e sobre todo que nos permite adaptarnos aos novos protocolos". 

Con estes novos protocolos a dose por sesión pode ser máis alta, e deste xeito se reduce o tempo do tratamento. A doutora Rodríguez di que se "mellora significativamente tanto a calidade do tratamento como a calidade de vida dos pacientes. 

A Xunta investiu 4,4 millóns de euros nos dous aceleradores lineais de Ourense.