León XIV agradece en San Pedro o apoio recibido durante a súa convalecencia
O pontífice reapareceu no Vaticano tras a súa intervención de cancro de pulmón
Tras o rezo do Angelus, anunciou que vai retomar as súas actividades de xeito gradual
O Papa nunha fiestra do Pazo Apostólico. REUTERS/Stoyan Nenov
León XIV afirmou este domingo tras o rezo do Angelus que retomará de xeito gradual a súa actividade e agradeceu o apoio que recibiu durante a súa operación e convalecencia por un adenocarcinoma pulmonar.
"Unha vez superada esta difícil etapa, como saben, retomarei gradualmente as miñas actividades, sempre coa axuda de Dios e as súas oracións", dixo o pontífice nunha alocución máis curta do habitual nesta pregaria dominical.
Ante milleiros de persoas congregadas na praza de San Pedro, o Papa asegurou que "esta experiencia" lle permitiu sentirse "especialmente preto de quen padece enfermidades e discapacidades".
"Grazas a todos e bo domingo!", concluíu desde a fiestra dos seus aposentos no Pazo Apostólico.
Un grupo de monxas aclama o pontífice. REUTERS/Matteo Minnella
León XIV, de 71 anos, reapareceu no mesmo escenario onde hai unha semana anunciou que debía someterse a unha intervención por mor dun nódulo que tiña no pulmón.
Tras a cirurxía, que se lle practicou o pasado 13 de outubro no hospital Gemelli de Roma, confirmáronlle que se trataba dun adenocarcinoma, un tipo de cancro, polo que se lle extirpou todo o lóbulo inferior do pulmón dereito.
