Os Entroidos de Manzaneda, Viana e Vilariño de Conso, declarados Festa de Interese Turístico Nacional

Os Entroidos do oriente ourensán, entroidos tradicionais dos municipios de Manzaneda, Viana do Bolo e Vilariño de Conso, recibiron a declaración de Festa de Interese Turístico Nacional que outorga a Secretaría de Estado de Turismo, en recoñecemento ao seu carácter ancestral e valores culturais e polos que son unha celebración de grande atractivo turístico.

Nun comunicado, o Ministerio de Industria e Turismo destacou que estes tres municipios da comarca se agruparon para presentar unha solicitude conxunta e que os seus entroidos, cunhas características comúns e entrelazadas, puidesen ser Festa de Interese Turístico Nacional.

Unha vez resolta esta solicitude ao cumprírense todos os requisitos esixidos para esta declaración, a secretaria de Estado de Turismo, Rosario Sánchez, valorou a unión destes concellos para conseguir un recoñecemento conxunto para unhas festas propias que se relacionan entre si e se preservaron en maior medida que noutros lugares.

Os Entroidos do Oriente Ourensán son entroidos tradicionais que se celebran nestas localidades limítrofes entre si, e os veciños de cada municipio, agrupados en folións, únense ás celebracións dos outros municipios. A modo de embaixadas entre aldeas, concertábanse e séguense concertando visitas e intercambios con folións doutros lugares.

Un dos trazos característicos máis importantes e coñecidos destas festas son as máscaras e personaxes identificables que cada un destes entroidos teñen en común. En Manzaneda, a tradicional máscara, e a figura do Boteiro en Vilariño de Conso e Viana do Bolo.

O ministerio sinala que é difícil precisar tanto os comezos como os motivos polos que xorde o entroido na comarca que agrupa estes tres municipios. Trátase dunha festividade pagá de carácter ancestral asociada ao cambio de estación, con referencias romanas, celtas ou gregas.

É unha celebración de grande atractivo turístico que conta con distintas iniciativas para garantir a súa promoción, difusión e permanencia no tempo, por exemplo, o Festival Internacional Mascarada Ibérica ViBoMask que se celebra en Viana do Bolo e Vilariño de Conso, un evento cultural no que se congregan as máis espectaculares máscaras de entroido tanto de Galicia como doutros lugares de España e doutros países como Portugal.

Coa declaración da festa dos Entroidos do Oriente Ourensán, xa son 162 as festas populares de España declaradas de Interese Turístico Nacional. Na comunidade de Galicia, é a undécima festa con esta distinción.