Os cativos preparan os disfraces para o gran desfile infantil de Xinzo de Limia
Mil cincocentos pequenos desfilarán no Gran Desfile Infantil do Entroido, que congrega estudantes de toda a comarca
Faltan aínda dúas semanas, pero xa están cos preparativos, que converten as aulas en prolíficos talleres de disfraces
No colexio Carlos Casares, un dos dous CEIP que hai en Xinzo de Limia, afánanse en preparar o desfile infantil de Entroido, que se celebrará o venres 28 de febreiro.
A temática que este ano elixiu o colexio Carlos Casares para este desfile é, ao tempo, unha lección da historia cultural dos últimos cincuenta anos, os anos que cumpre o colexio.
"Cada grupo vai dunha década diferente, de algo que ocorreu culturalmente nesa década. Os máis pequeniños van dos 70, vestidos de hippies, por exemplo. E os maiores, do 2020, das tecnoloxías futuristas. E os de segundo, por exemplo, de Locomía, a finais dos 80 e principios dos 90", conta José Carlos González, director do CEIP Carlos Casares.
Aos de cuarto tocoulles unha película que conmoveu toda unha xeración a principios dos 2000. "Ímonos disfrazar da década dos 2000, de 'Buscando a Nemo'". "Primeiro facemos o deseño en papel e despois pintámolas cun pincel", comentan.
Tradición
A tradición do Entroido, tan potente nesta vila, non corre perigo. Prende rápido nos máis novos.
"Gústame bastante, porque hai charangas, música...". "Porque me encanta disfrazarme e pasalo ben cos amigos", comentan dúas nenas sobre o Entroido.
Canda eles, participarán no desfile infantil todos os alumnos e alumnas da comarca da Limia, desde as escolas infantís a secundaria. En total, ao redor de mil cincocentos cativos.
