Os carburantes disparan o IPC ao 4,3 % en agosto, a taxa máis alta desde 2023

Os prezos aumentaron en España un 4,3 % en agosto con respecto ao mesmo mes de 2025 impulsados polo encarecemento dos carburantes, unha repunta sete décimas superior ao de xullo (3,6 %) e que supón a taxa máis alta desde febreiro de 2023.

O Instituto Nacional de Estatística (INE) publicou este venres o dato adiantado do índice de prezos de consumo (IPC) deste mes, que estivo marcado polo encarecemento dos combustibles e lubricantes para vehículos privados, uns produtos que en agosto de 2025 se abarataran.

Tamén influíu, aínda que en menor medida, o grupo de alimentos e bebidas non alcohólicas, que baixaron menos en agosto do que o fixeron nese mesmo mes do pasado ano, aínda que o INE non ofrecerá a información detallada ata o próximo 15 de setembro.

O dato adiantado de agosto apunta a unha aceleración da inflación, que xa aumentara catro décimas en xullo, ata o 3,6 %, impulsada polo encarecemento dos produtos enerxéticos debido tanto á persistencia do conflito en Oriente Medio como ao comezo da retirada das medidas fiscais de apoio.

De feito, a forte suba do prezo do gasóleo activou a cláusula prevista no decreto de medidas para conter o impacto da guerra, polo que a partir do 1 de setembro a rebaixa do imposto de hidrocarburos para este produto será de 20 céntimos por litro, en lugar dos 5 céntimos previstos para ese mes.

A gasolina, en cambio, ao non superar o limiar establecido, mantén o calendario ordinario de retirada gradual, cunha rebaixa de 5 céntimos por litro en setembro. Do mesmo xeito, a electricidade e o gas continuarán co IVE ao 21 %.

O INE tamén publicou este venres o avance da inflación subxacente, que non ten en conta os alimentos non elaborados nin os produtos enerxéticos por ser os máis volátiles, que se moderou unha décima en agosto, ata o 2,9 %.

O Ministerio de Economía asegurou que o Goberno "mantén un seguimento minuto a minuto do impacto do conflito en Irán sobre a economía española" xunto a axentes sociais e sectores afectados e lembrou que as medidas de apoio recollidas no plan de resposta continúan vixentes.

Economía achaca o repunte dos prezos ao encarecemento dos carburantes polo impacto do conflito e, nese sentido, apunta que este non se trasladou á inflación subxacente.

Os prezos soben un 0,7 % respecto a xullo

En termos mensuais, os prezos subiron un 0,7 % con respecto a xullo, un aumento catro décimas superior ao dese mes (0,3 %) co que encadean sete meses consecutivos de incrementos.

Polo que respecta ao índice de prezos de consumo harmonizado (IPCA), situouse no 4,5 % en termos anuais, seis décimas por encima da taxa de xullo, cun aumento de prezos do 0,6 % con respecto ao mes anterior.