O prezo da gasolina cae un 7,2 % desde a entrada en vigor do novo desconto fiscal

O prezo da gasolina nas estacións de servizo españolas caeu un 7,15 % desde a entrada en vigor do novo paquete de medidas anticrise, que recolle un desconto de 20 céntimos por litro para os carburantes.

A gasolina pagábase de media este martes a 1,791 euros por litro, un 7,4 % menos que hai unha semana e un 1,7 % menos que hai un mes, segundo o histórico de prezos do Ministerio para a Transición Ecolóxica e o Reto Demográfico.

O 1 de outubro entrou en vigor o decreto que estende ata final de ano os descontos sobre o imposto de hidrocarburos que pagan os carburantes, que se situarán en 20 céntimos por litro en outubro, 13 céntimos por litro en novembro e 6 céntimos por litro en decembro.

En setembro, o diésel xa contaba cunha rebaixa fiscal de 20 céntimos por litro, pero no caso da gasolina o desconto era de 5 céntimos, polo que a aplicación do novo paquete de medidas anticrise para atenuar os efectos da guerra en Irán impactou positivamente este mes no prezo da gasolina.

Maior caída desde marzo

De feito, o descenso intersemanal rexistrado no custo deste carburantes foi o maior desde marzo, xusto cando entrou en vigor o primeiro paquete de medidas.

O prezo do diésel tamén descendeu desde a entrada en vigor das novas medidas, a pesar de que xa contaba o mes pasado cos 20 céntimos por litro rebaixados.

Este martes pagábase o gasóleo de media a 1,896 euros por litro nas gasolineiras españolas, un 1,7 % menos que hai unha semana pero un 5 % máis cara que hai un mes.

Deste xeito, encher un depósito de 55 litros de gasóleo custaba este martes 104,28 euros e un de gasolina 98,5 euros.