Os atranques dos Xenerais da Ulla convocan a veciñanza para arrincar o Entroido

Os primeiros altos e atranques deste Entroido puideron escoitarse na tarde do sábado en San Miguel de Sarandón, en Vedra.

Alí chegaron os Xenerais da Ulla e mais os Correos que percorren durante estas fins de semana oito concellos da zona que manteñen a tradición entroideira na comarca.

O temporal amainou e os Xenerais puideron lucir os seus tricornes e lanzar os "Vivas" casa por casa. Acompañados de coros e comparsas remataron a tarde coa escenificación dos atranques onde lle deron un repaso á actualidade local e á rexouba veciñal.