Os artistas ourensáns abren os seus talleres ao público

As esculturas de Manuel Buciños reciben os visitantes, resplandecentes baixo un sol radiante, o mesmo que ilumina o taller do artista. Corenta anos de acción creativa concentrados nun único espazo.

"Si, toda. Hai obras desde o primeiro ano que acabei Belas Artes, ata hoxe", confirma o escultor.

A iniciativa dos Estudios Abertos naceu o ano pasado, para achegar os creadores ao seu público, nunha cidade que se louvaba de ser a Atenas de Galicia.

"Deixou de selo. E eu creo que isto dálle vida. A xente vén, está a gusto, coñece os artistas e a obra que están facendo...", reflexiona Buciños, crítico coa falta de apoio institucional ás artes.

Participan máis de trinta artistas de distintas disciplinas, 19 espazos repartidos entre a cidade e varios concellos da provincia.

"Dar a coñecer os artistas locais que temos na provincia, que son moitos, e moitos non se coñecían entre eles", explica Victoria Mociños, unha das organizadoras.

Os propios artistas son os guías nos seus talleres. O de Mon Devane era antes unha farmacia.

"Noto que hai bastante xente que coñece o meu traballo, sobre todo de rúa, que está moi interesada en coñecer sobre todo o traballo que hai no estudio. É un espazo, para min, multidisciplinar", comenta Mon Devane.

Mon Devane foi, precisamente, o gañador do premio Adquisición que outorga o xurado por unha Pulpeza, nunca exposta, que, coma os Estudios Abertos, integra modernidade e tradición.