Os aniversarios infantís, cada vez máis caros, ata 300 euros por festa

É a última incorporación de ocio infantil en Ourense: Un spa con pintura de unllas, maquillaxe e peiteado. Custa entre 20 e 30 euros dependendo do paquete elixido.

"Eu, como nai, quixen facer algo distinto. A miña filla quere ir ao cine, pero non o día do seu aniversario. Ese día, quere algo máis especial", explica Angely Angulo, de Burbuja Chic.

"Eu queríalle regalar á miña filla algo diferente, que non fora o de sempre", ratifica unha nai.

Con ingresos que soben dos trescentos euros por celebración, o dos aniversarios infantís converteuse nos últimos anos nun suculento mercado. "Entre 200 e 300 euros, segundo o que fagas". "Máis de trescentos euros por aniversario", comentan unha nai e un pai.

A opción máis recorrida segue a ser a dos parques de bólas e atraccións, con prezos entre quince e dezoito euros por neno, dependendo das instalacións.

"Antes facíanse os aniversarios na casa, pero iso xa non é viable. Teñen moitos amigos, son festas grandes, e non meteriramos na casa 15 ou 20 nenos", sinala Maite Gómez, de Galiocio.

Todo un mundo que require planificación, segundo comentan varios pais e nais, que se organizan mediante grupos de what'sapp e aportando sempre a mesma cantidade, entre 10 e 15 euros por neno.