O Cisneros retoma as clases, pero os veciños desaloxados aínda non poden volver ás casas

Os nenos do colexio Cardenal Cisneros volveron hoxe ás aulas, iso si, cos patios polo de agora clausurados e algo menos de afluencia que un día normal. Mentres, os veciños do edificio lindeiro nesta rúa Fonte do Monte seguen desaloxados á espera de que os informes dos técnicos garantan a seguridade da cimentación.

Con algo menos de xente da que é habitual no colexio Cisneros os nenos volveron hoxe ás aulas. 

Ledicia entre os cativos e aínda algo de sorpresa polo acontecido entre as nais e pais que hoxe levaban os cativos á escola despois de que onte se suspenderan as clases. Moitos aínda tiñan en mente as imaxes do mércores pasado.

Tras a derruba do muro, no patio exterior, a zona quedou clausurada ata que rematen todas as peritaxes e os labores de limpeza. "Pois estaremos entre a biblioteca, a sala de audiovisuais e o patio interior ata que non arranxen o patio de fóra", explica Patricia Solla, xefa de estudos do centro.

Mentres, no edificio lindeiro co colexio, diante do que se produciu a fuga de auga que provocou o derrubamento, os seus veciños levan xa dúas noites realoxados fóra da casa. "Aínda non pasaron 48 horas, pero agora xa hai que empezar a saber en que situación imos estar e o que temos que facer, claro", di un deles.

Os bombeiros traballan para determinar se a derruba do muro afectou tamén á estabilidade do edificio.

"Agora consideramos que o máis seguro é facer un estudo xeotécnico para ver que efectivamente as cargas que nos chegan ata o terreo este terreo é quen de soportalas con seguridade, aparte temos o patio dun colexio debaixo e temos que estar seguros", apunta José Benito Álvarez, oficial de incendios. 

O importante, din, é garantir a seguridade para poder ir recuperando a normalidade aos poucos.