Os agricultores da Limia demandan máis analíticas de solo para intentar aforrar fertilizantes
O Centro de Desenvolvemento Agrogandeiro que o Inorde ten en Xinzo realizou no que vai de ano máis de 1.400 análises
Os produtores poden coñecer así os os nutrientes da terra para fertilizar de xeito máis rendible e máis sostible
Unha semana antes de que comece o forte da nova campaña de plantación de pataca na Limia, a principal comarca produtora de Galicia, no laboratorio do Inorde onde analizan as propiedades da terra están estes días a pleno rendemento.
No Centro de Desenvolvemento Agrogandeiro levan máis de 20 anos realizando analíticas de solos, pero esta tempada o traballo é maior. A demanda destas análises incrementouse este ano un 20 por cento, dende xaneiro ata hoxe levan xa feitas máis 1.400.
Sabendo os nutrientes que ten a terra onde van cultivar, os agricultores poderán fertilizar de xeito máis sostible e máis rendible.
Estes agricultores limiaos teñen máis de 60 hectáreas de cultivos, principalmente pataca, que comezarán a sementar para a vindeira semana. Grazas a estas analíticas poden aforrar en fertilizantes e mellorar a produción.
As novas normativas que entrarán en vigor en breve para fomentar unha agricultura máis respectuosa co medio, farán obrigatorias estas analíticas que hoxe son optativas.
