O Adif inviste 3,4 millóns de euros na mellora do tramo ferroviario Ortigueira-Burela
As obras afectarán 40 quilómetros de trincheiras da rede de ancho métrico
O obxectivo é aumentar a fiabilidade e reducir as incidencias na circulación
O Adif adxudicou por 3,4 millóns de euros actuacións de reforzo e consolidación de trincheiras no tramo da rede de ancho métrico entre Ortigueira (A Coruña) e Burela (Lugo), de 55 quilómetros.
Os traballos afectarán preto de 40 quilómetros de trincheiras e buscan mellorar a fiabilidade da infraestrutura e minimizar posibles afeccións ao tráfico ferroviario.
Obras previstas
O contrato inclúe tarefas de roza e limpeza, saneamento e suavización da pendente dos noiros para garantir unha maior estabilidade, que se completará co selado de zonas puntuais.
O Adif tamén instalará mallas protectoras en áreas rochosas susceptibles de fracturación, executará cunetas revestidas para reter materiais que poidan desprenderse e mellorará os sistemas de drenaxe lonxitudinal da vía para facilitar a evacuación de augas de escorrentía.
