A DXT crea un novo sinal para avisar dun radar que controla a distancia de seguridade

Que é iso? Que significa? Hai aí un radar? Son preguntas que circulan estes días polas estradas españolas, e polas redes sociais, a conta do último anuncio da Dirección Xeral de Tráfico. A DXT fixo público o deseño dun novo sinal que indica, segundo explica textualmente o organismo, "a existencia dun dispositivo de control de separación mínima entre vehículos nun punto ou tramo dunha autoestrada ou autovía". Traducido, un radar para vixiar a distancia de seguridade.

O sinal, un rectángulo de fondo azul, inclúe o símbolo das ondas, habitual cando se infoma dun radar, e un aviso circular de prohibición cunha indicación de 70 metros e dous vehículos. Pero a día de hoxe non se pode ver en ningunha estrada. A DXT aclara que se trata dun deseño para o futuro. Agora mesmo, din, non existen en España radares que controlen a distancia de seguridade pero si a tecnoloxía podería permitir que si se faga axiña. Por iso Tráfico presenta agora o sinal que, chegado o día, informará deses controis. Noutras palabras, de momento non hai máquinas que multen por non respectar a separación mínima.

Multan os axentes

En calquera caso, nin os sinais nin os radares son imprescindibles. Agora son os axentes os que teñen a potestade para multar un condutor se a patrulla estima, polos seus propios medios, que un vehículo non garda a distancia requirida. Na práctica, podemos medilo non con lonxitude, senón con tempo. A recomendación xeral é que, para evitar unha colisión por alcance, cando menos hai que manter dous segundos entre vehículos. Máis, se chove e até catro segundos se se está circulando por un túnel.