Os agraciados co Gordo de Nadal en Villamanín cobran o premio cunha quitación do 10 %
Co desconto de Facenda e a quitación, a cada papeleta premiada correspóndenlle 59.000 euros
A gran maioría dos propietarios das 447 papeletas celebran o acordo e renuncian ao dereito a reclamar
O número do Gordo de Nadal, o 79.432, amais de fortuna, trouxo un pesadelo á pequena localidade leonesa de Villamanín. A comision de festas vendera 450 papeletas dese número, pero axiña se deron conta de que 50 delas non foran debidamente conformadas polos décimos correspondentes, o que supuña un desfasamento de catro millóns de euros.
Desde ese momento non pararon de buscar unha solución, que finalmente se traduciu nunha quita do dez por cento para que todo o mundo cobre. Os pagos empezaron a facerse efectivos este martes.
"Eu sinto que me tocou a lotería tres veces; o día do sorteo, onte cando me chamaron para o pago e agora".
Inmaculada foi unha das primeiras en cobrar. Contan que nuns dez días completarán o pago das 447 papeletas localizadas. Todos os afortunados, menos seis, aceptaron o acordo dos asesores xurídicos da comisión de festas, de asumir a quitación e renunciar a calquera reclamación.
"Estamos moi contentos e estades vendo a xente que entra e sae cos seus cartos moi contentos", di Antonio Gómez Gallardo, o avogado que asesorou os rapaces da comisión.
"Gastei catro euros e un para a asociación e hoxe recibín algún máis".
"Se así, con este 10 % menos, cobramos todos 59.000 euros, benvido sexa!"
Gran parte dos premiados son tamén veciños deste lugar de menos de mil habitantes. Tanto coma cobrar o premio, ansiaban unha solución coma esta que lles permitira poder celebralo.
"Era algo que facía falta; eu sempre dixen que quería que se nos recordara polo lugar que arranxou a lea da lotería, e iso é o que conseguimos; arranxamos a lea da lotería!".
