Este domingo baixan as temperaturas en Galicia e agárdase neve por enriba dos 1.000 metros

Todo o litoral galego permanece en aviso. Hai moito mar e tamén vento. Na Mariña, na Costa da Morte e no noroeste da Coruña o aviso é laranxa. As ondas andan entre os catro e os sete metros e o vento pode chegar nalgúns puntos ata os 61 quilómetros por hora.

Segundo MeteoGalicia, amais de vento e ondas de ata sete metros, tamén vai chegar a chuvia e a neve por enriba dos 1.000 metros.

Bo día! Nótase xa a masa de aire frío que entrou na xornada anterior con valores mínimos en zonas do interior por debaixo dos 5ºC e en zonas altas dos 0ºC🥶.
Seguiremos con chuvascos ocasionais máis probables na metade norte🌦️ e coa cota de neve por riba dos 1000 metros❄️. pic.twitter.com/WyOTCCB0YE

— MeteoGalicia (@MeteoGalicia) December 8, 2024

A situación está complicada esta fin de semana no litoral. Estas son imaxes de Muxía deste mediodía. O mar está bravo e aproveitando a ponte festiva curiosos e turistas achegábanse ata a costa para contemplalo, algúns con actitudes pouco prudentes.

"Cando veñen ondas fortes e grandes, a xente parece que é moi inconsciente á hora de achegarse tanto", "Estivemos tamén en cabo Touriñán, no faro, precioso, pero moito vento hai que ter moito coidado", din algúns dos visitantes en Muxía.

Na Costa da Morte, na zona do noroeste do litoral da Coruña, e na mariña luguesa hai aviso laranxa. As ondas superan os cinco metros e hai fortes ventos do norte con intervalos de forza 7.

"Está o mar un pouco feo, é normal o aviso, pero a frota está amarrada  e non hai problema", "A min gústame ver o mar así", "está bastante picado, hai que ter coidadiño que isto é perigoso", comentaban outros visitantes na mariña luguesa.

Ademais, as boas temperaturas de novembro xa quedan atrás. Chega o frío e baixa a cota de neve o domingo ata os mil metros.