En estado crítico a moza de 17 anos á que lle prendeu lume a súa parella en Canarias

Unha moza de 17 anos atópase en estado crítico logo de que a súa parella de 20 anos a agredise con material combustible prendéndolle lume. Os feitos ocorreron na rúa Roque Nublo, no barrio da Isleta nas Palmas de Gran Canaria. A Policía Nacional detivo a súa parella.

Todo pasou arredor das 04:00 horas, cando o 112 recibía unha alerta de que se estaba producindo un incendio nunha vivenda do barrio. Os axentes de emerxencias atoparon a moza na rúa, con signos de queimaduras graves por todo o corpo.

Logo, o persoal do Servizo de Urxencias Canario (SUC) comprobou o estado das queimaduras e trasladárona, en estado crítico, nunha ambulancia medicalizada ao Hospital Universitario de Gran Canaria Doutor Negrín.

Dende o hospital, prevén evacuala á unidade de queimados de Sevilla pola gravidade das queimaduras, que lle afectaron o 95 % do corpo.

Tamén atoparon un mozo con síntomas de inhalación de fume que foi asistido polo persoal sanitario e trasladado ao mesmo hospital.

Ao mozo detivérono cando a moza lles dixo aos axentes que el lle provocara as lesións de queimaduras. A policía non puido confirmar se mantiñan unha relación sentimental, pero de momento puntualízano ata que poidan declarar.

Na operación de resolución participaron efectivos do Servizo de Extinción de Incendios, Salvamento e Rescate das Palmas de Gran Canaria, e tamén axentes da Policía Local e da Policía Nacional.