O Xapón toma como referencia o sistema de prevención de incendios de Galicia para evitar unha nova catástrofe

O Xapón sufriu este ano os seus peores incendios forestais en décadas, e unha das principais canles do país emitiu unha reportaxe sobre a prevención do lume, con varias referencias a Galicia. 

Amosan o traballo da Unidade de Investigación de Incendios, que utiliza drons equipados con cámaras térmicas para detectar focos de calor e posibles movementos sospeitosos. E inclúen declaracións do responsable desta unidade. 

E tamén de Manuel Rodríguez, director xeral de Defensa do Monte, que fala da nova realidade en que os incendios forestais aumentan en frecuencia e intensidade. Di que hai que estar preparados e que non hai tempo de sobra. 

Tamén se menciona o centro de coordinación dende o que monitorizan os montes galegos cunhas 200 cámaras de vixilancia.

A reportaxe emitiuse a pasada fin de semana e conclúe que prevención, tecnoloxía e planificación territorial deben combinarse para facer fronte e anticiparse a un novo tipo de incendios cada vez máis explosivos, polo cambio climático, e ás veces, incluso, imposibles de extinguir.