Once anos de cárcere para o atracador dunha sucursal bancaria en Camariñas

A sección segunda da Audiencia Provincial da Coruña impuxo once anos de cárcere ao autor do atraco cometido nunha sucursal bancaria da parroquia da Ponte do Porto, en Camariñas.

A Sala considerou acreditado que cometeu un delito de roubo con violencia e intimidación con instrumento perigoso e en local aberto ao público, en concurso cun delito de detención ilegal, ademais dun delito de lesións. O tribunal aplicou tamén as agravantes de reincidencia e uso de disfrace.

Perruca, lentes de sol e unhas bridas para amarrar o empregado

O tribunal detallou que o acusado entrou na oficina o 27 de febreiro de 2024 cunha perruca e lentes de sol para ocultar a identidade. Segundo o fallo, apuntou ao único empregado con un obxecto contundente que semellaba unha arma curta, golpeouno e retívoo con bridas para levar o diñeiro da caixa e do caixeiro automático.

A Sala indicou que o botín foi de 44.380 euros.

Ademais da pena de prisión, o tribunal ordenou que o condenado pague 15.600 euros ao empregado polas lesións e secuelas e 44.380 euros á entidade bancaria polo importe subtraído.

A sentenza non é firme e pode recorrerse ante o Tribunal Superior de Xustiza de Galicia.