Oliver Laxe está pensando en rodar a súa próxima película no Amazonas tras o éxito de "Sirât"

O martes saberemos se Sirât continúa a súa carreira aos Óscar como candidata española á mellor película internacional. De ser así, quedaría esperar ao 22 de xaneiro para ver se é elixida unha das cinco designadas para a categoría.

Oliver Laxe afirma que usará o éxito do filme para dobrar a aposta no seu próximo traballo.

"Moita xente pregúntame se o éxito me vai cambiar. Ao contrario, se é que me estou rindo da que vou montar coa miña seguinte película", asegura o director.

Para empezar está pensando en rodala no Amazonas.

"Teño ganas de ir con algún actor e morrer con el. Que, eu como cineasta e el como actor, nos abramos as tripas alí", explica o galego.

O director congratúlase de que Sirât esperte controversia.

"Hai conversacións bastante acaloradas: xente á que lle parece unha obra mestra, xente á que lle parece unha farsa, pero están falando de cine, da súa experiencia. É moi san e moi bo para o cine", opina.

Admite que os artistas teñen egos desmesurados. Di que é porque só lles falan os admiradores e chancea sobre os seus memes na Internet.

"Xa lle dixen ao meu psicoterapeuta: 'non te necesito, xa me están facendo memes que están dando no cravo'", chancea.

Laxe, que continúa promocionando Sirât polo mundo, fixo unha instalación para o Museo Reina Sofía, Hu, independente de Sirât pero nada do mesmo proceso creativo.

"Desprego o meu imaxinario, as cousas que me gustan: o sagrado, a natureza, o transo, a música, bailar...", explica.

A instalación inaugúrase o martes e poderá visitarse ata o 20 de abril.