Oímbra recrea a pisada e o prensado das uvas nos lagares rupestres
O que antes era unha xornada de traballo agora é unha festa para homenaxear a viticultura tradicional e o patrimonio
Tentan recuperar o legado enolóxico e que a xente nova poida coñecer como traballaban os seu antepasados
É o concello de Galicia cunha maior concentración de lagares rupestres, ten 20 construcións restauradas
O concello ourensán de Oímbra volve ao pasado para renderlles unha homenaxe á viticultura tradicional e tamén ao seu patrimonio arqueolóxico. Nun dos seus lagares rupestres recrean a pisada tradicional da uva, tal como xa facían os romanos hai uns 2.000 anos.
Neste lagar restaurado coñecido como Xan de Preto desde o século II, a veciñanza de Oímbra viaxa no tempo para revivir a pisadura tradicional da uva, tal como facían os seus antepasados.
"É recordar a nosa nenez, cando se facía nas casas de cada un", di un veciño.
"Xa desde 2018 que empezamos e recórdanos cando de pequena o faciamos así, o viño", explica a alcaldesa de Oímbra, Ana Villarino.
O que antes era unha xornada de traballo agora é unha festa histórica, que serve para lembrar a súa herdanza vinícola. E do lagar sae o primeiro mosto do que será o viño.
"Isto parece champaña. Aínda non o probei pero penso que debe estar bo, porque isto é o mellor da uva, o mosto", asegura un veciño.
"Ao pisalo sae o mosto, e logo ao prensalo sairá un pouco máis", asegura outro.
A historia do municipio está ligada desde sempre ao viño e esta xornada serve tamén para que os máis pequenos coñezan os labores tradicionais.
"É un pouco revivir o pisado tradicional e volver ás nosas raíces. Temos uns dos mellores viños do mundo, de España e de Galicia", apunta Manuel Vázquez, o presidente da D. O. Monterrei.
É unha festa para pór en valor o seu patrimonio arqueolóxico, cultural e enolóxico. O de Oímbra é o concello de Galicia coa maior concentración de lagares rupestres, con 20 construcións restauradas que se remontan ao século II, na época dos romanos.
