Declaran oito testemuñas novas vencelladas ao caso de Samuel Luiz

Continúa a investigación para esclarecer a morte violenta de Samuel Luiz, o mozo de 24 anos asasinado a golpes na madrugada do pasado 3 de xullo no paseo marítimo da Coruña.

Estaba previsto que ao longo da mañá deste venres o xuíz instrutor e as partes escoitasen a versión de oito novas testemuñas vencelladas co caso e solicitadas pola Fiscalía.

Entre os citados, hai persoas que viron, supostamente, como un grupo de mozos mallou en Samuel durante seis minutos ata acabar coa súa vida e outras que foron chamadas por ter algún tipo de relación cos procesados o día en que se rexistraron os feitos.

O crime xa ten os seus presuntos culpables. As seis primeiras detencións producíanse días despois do asasinato de Samuel. Case tres meses máis tarde producíase a sétima. A día de hoxe, dous menores atópanse ingresados nun centro especializado.

Dos maiores, tres varóns están na cadea e os outros dous, entre os que está a moza dun dos anteriores, quedaron en liberdade coa obriga de comparecer no xulgado periodicamente.

A fiscalía, a acusación particular e tamén a popular piden asasinato para os acusados maiores de idade. O caso dos dous menores está a ser tramitado pola Fiscalía de Menores.