O virus da gripe xa provoca ingresos en Galicia, dez semanas antes do pico habitual
Só na area de Santiago xa houbo 187 ingresos e unha defunción
Os hospitais teñen listos plans de continxencia pola convivencia da gripe coa covid e o VRS
A subliñaxe de ómicron BQ1.1 xa representa o 3 % dos casos galegos de covid
Despois de dous outonos en que estivo desprazado pola covid, o virus da gripe volve neste antes de tempo e coa súa virulencia habitual. Os centros de saúde xa están atendendo un número de casos que non é propio desta época. A incidencia está sendo maior en nenos e maiores de 60 anos.
"A gripe é un cadro serio, pode durar ata sete días con febre moi alta, malestar xeral importante, fatiga...", explica o médico de Atención Primaria César Pazo.
Nos servizos de Medicina Preventiva avisan de que a curva epidémica das infeccións respiratorias está xa moi por riba do habitual neste tempo.
"Dobrou a incidencia nesta semana, que é a semana 42", explica Cristina Fernández, xefa de servizo da Área de Preventiva na área Santiago-A Barbanza.
Son dez semanas antes do normal. Só en Santiago xa se contabilizan 187 ingresos e unha defunción por gripe. E a coincidencia cos virus respiratorio sinticial (VRS) e a covid fan prever no hospital unhas semanas intensas.
"Xa se están dando casos de dobre infección gripe-covid, que poden derivar en pneumonías víricas e ingresos na UCI. Por iso é mais importante ca nunca que nos vacinemos", explica a responsable de preventiva, Cristina Fernández.
Está recomendada a vacinación das persoas maiores de 60 anos, da gripe e a covid, en grandes recintos ou centros de saúde; e da gripe os nenos de entre 6 meses e 5 anos.
A nova liñaxe de ómicron a BQ1.1 xa representa o 3 % dos casos galegos e moi pronto será maioritaria.
