O TSXG confirma a condena de 13 anos e medio de prisión para o autor do crime de Coia

A Sala do civil e Penal do Tribunal Superior de Xustiza de Galicia (TSXG) confirmou integramente a condena imposta pola Audiencia Provincial de Pontevedra para José Luis M.C., a quen un tribunal de xurado achou culpable do delito de asasinato e do delito de tenza ilícita de armas, polo coñecido como crime de Coia.

Así, nunha sentenza datada o 18 de marzo de 2026, o alto tribunal galego confirma a pena de 12 anos e seis meses de prisión por un delito de asasinato e a condena de 1 ano de prisión por delito de tenza ilícita de armas.

Desta forma, os maxistrados indican que a pena polo delito de asasinato aplicouse correctamente tendo en conta a concorrencia de tres atenuantes --alteración psíquica, medo e confesión--, que se atopa "próxima á metade inferior que corresponde, ao baixar un grao".

En canto á pena polo delito de tenza ilícita de armas, e non concorrendo circunstancia atenuante algunha procede impoñela pena de 1 ano de prisión.

Feitos probados

O veredicto do xurado considerou que o vigués matou un home ao que coñecía desde había anos, Francisco Javier B.D., que se presentou no seu domicilio na noite do 6 de abril de 2024, armado cun machete e unha barra metálica.

A maxistrada presidenta indicou na sentenza que o acusado lle abriu a porta da súa vivenda portando unha escopeta, coa que realizou dous disparos, un dos cales o efectuou a menos dun metro de distancia da vítima, impactando na súa fazula e rexión cervical esquerda, o que lle causou a morte.

Tal e como concluíu o xurado, a resolución indicou que o acusado actuou aceptando que podería acabar coa vida da vítima e sen que esta tivese oportunidade de defenderse. Ademais, os disparos realizounos cunha escopeta que tiña na súa casa, carecendo de licenza, e co número de serie borrado, polo que era unha arma prohibida.

No momento dos feitos, José Luis tiña as súas capacidades levemente afectadas polo consumo de cánnabis e cocaína e por estar diagnosticado dun trastorno de saúde mental.

Así mesmo, a Audiencia de Pontevedra sinalou que actuou "por pánico ou terror tal, ante a presenza da vítima cun coitelo e unha barra de aceiro, que limitou levemente a súa capacidade de actuar doutra maneira".

Igualmente, na sentenza indícase que, cando xa estaba detido pola Policía como posible autor dos feitos, o acusado confesou a autoría, o que contribuíu de forma eficaz á investigación.