O TSXG acolle a apelación pola sentenza que condenou o noivo de Nerea Añel por homicidio por omisión

O Tribunal Superior de Xustiza de Galicia (TSXG) acolle este luns a vista de apelación contra a sentenza ditada pola Audiencia Provincial de Ourense que condenou ao noivo de Nerea Añel por un homicidio por omisión.

En novembro de 2024, a Audiencia condenou a 10 anos de cárcere á parella da moza cuxo corpo foi localizado oito meses despois da súa desaparición no leito dun río en Barbadás. En concreto, considerouno responsable dun delito de homicidio por omisión.

O ditame produciuse despois de que o pasado mes de xuño o propio alto tribunal galego declarase nula a primeira sentenza emitida pola Audiencia Provincial, por alcanzar "unha conclusión diferente á emitida polos xurados, que atenderan a tese acusatoria". Fora absolto ao considerar o tribunal que as condutas probadas do acusado non poden incluírse no tipo penal de homicidio.

Por iso, ordenou retrotraer as actuacións ao momento anterior a ditarse a resolución, co obxectivo de que se ditase outra sentenza que fose conforme ao veredicto de culpabilidade emitido polo xurado. E é que o tribunal popular entendera que o falecemento da vítima produciuse pola omisión de auxilio do investigado.

Na resolución, o maxistrado presidente do Tribunal do Xurado indica que o acusado, tal e como se considerou probado na acta do veredicto, "atopábase presente no momento no que se produciu o traumatismo cranioencefálico vertebral da vítima e non lle prestou a asistencia necesaria para evitar o seu falecemento".

Desta forma, entendeu acreditado que o falecemento da muller, que tiña 26 anos, "foi provocado pola falta de asistencia que debeu prestarlle a súa parella despois de producirse a súa caída nun punto non determinado".

O xurado asume, desta forma, a tese sostida polos médicos forenses de que as lesións que presentaba a vítima foron consecuencia dunha caída por precipitación, que estiman predominantemente accidental.