O TSXG absolve o condenado como cómplice do asasinato de Samuel Luiz

O Tribunal Superior de Xustiza de Galicia (TSXG) absolveu un dos catro condenados en primeira instancia polo asasinato de Samuel Luiz, cometido na madrugada do 3 de xullo de 2021 no paseo marítimo da Coruña. A Sala do Civil e Penal acolleu o recurso interposto por A. M. R., polo que revogou a sentenza da Audiencia Provincial da Coruña que o condenou a dez anos de cárcere como cómplice do crime.

Os maxistrados rexeitaron os recursos presentados polos outros tres condenados como autores do asasinato. Polo tanto, confirmaron as penas de cárcere que lles impuxeron.

Os membros do alto tribunal galego aseguran que a condena como cómplice de A. M. R. carece de base probatoria, pois “non consta acreditado que participase na agresión”.

A Sala explica na sentenza que comparte a tese do recorrente, pois "ningunha testemuña presencial sinala que o vise golpear, encararse coa vítima, impedir que se lle axudase, nin dificultar a súa fuxida".

O TSXG sinala que, ante a ausencia de proba directa, o xurado apoiouse en probas indiciarias, pero recalca que "en ningún momento se ve (nas gravacións) ningunha actuación das apuntadas no veredicto e feitos probados".

"Os xurados infiren que non tentaba separar porque ningunha testemuña o di, pois sinalan que ninguén separaba, pero a presunción de inocencia non pode destruírse a través desta manifestación, pois iso comportaría inverter a carga da proba", din os maxistrados na resolución, e especifican que "outros mozos tamén chegan ao lugar e non separan, e iso non se traduciu na súa imputación ou condena".

Ademais, destacan que hai unha testemuña que sinala que o recorrente "desvincúlase" do grupo agresor e "atravesa a calzada", un "testemuño favorable que non se ten en conta polos xurados". Todo iso leva á Sala a apreciar vulnerada a constitucional presunción de inocencia, "ao carecer a condena de base razoable" e, polo tanto, a acoller o recurso.

Con esta absolución e a previa de C. S. redúcense a cinco os condenados -hai outros dous que eran menores de idade no momento dos feitos e que xa cumpriron as súas penas- pola agresión grupal que matou a Samuel Luiz.

Recursos rexeitados dos outros tres condenados

Os maxistrados rexeitaron os recursos presentados polos outros tres condenados como autores do asasinato. Polo tanto, confirmaron a pena de 24 anos de cárcere imposta a Diego Montaña, pois no seu caso concorre a agravante de discriminación por motivos de orientación sexual; de 20 anos e medio de cárcere a Kaio Amaral Silva, tamén autor dun delito de roubo con violencia por subtraerlle o móbil á vítima; e de 20 anos de prisión a Alejandro Freire 'Yumba'.

O TSXG considera probado, no substancial, o relato de feitos da sentenza apelada. Así, entende acreditado que, cando a vítima, de 24 anos, se atopaba na parte superior da bancada que dá acceso o paseo marítimo, nas inmediacións dun pub, foi obxecto “dunha agresión grupal, como consecuencia da cal faleceu”.

No ditame indica que Diego Montaña, quen saíra uns minutos antes do local coa súa entón parella sentimental, foi quen iniciou a agresión, pois, ao ver a vítima cun teléfono móbil, creu que os estaba gravando.

"Polas palabras, xestos, forma de vestir, ton de voz e aparencia física da vítima, interpretou que era homosexual", destaca o TSXG na resolución, na que salienta que este feito "desencadeou a reacción totalmente agresiva de Diego Montaña contra el, pola súa animadversión cara á condición sexual homosexual que lle atribuíu".

Engade que, "por sorpresa e de forma repentina, abalanzouse sobre a vítima, golpeándoo con puñadas e patadas, principalmente nas zonas de cabeza e cara".

Nese momento, segundo consta no fallo, Alejandro Freire, amigo de Diego Montaña, sumouse á agresión "de forma inmediata, atacando á vítima por detrás, rodeando con forza o seu pescozo co seu brazo". A Sala afirma que, en cuestión de segundos, "adheríronse de forma progresiva ao ataque un numeroso grupo de amigos e coñecidos dos acusados que se atopaban nas inmediacións, entre eles dous menores de idade xa xulgados e condenados".

Os maxistrados afirman que Kaio Amaral "saíu correndo e integrouse no grupo agresor, propinando á vítima polo menos unha patada" e, ademais, mentres a rodeaban integrantes do grupo, actuando en unidade de acción, Amaral "impedía a súa fuxida e dificultaba calquera tipo de axuda ou defensa eficaz que puidesen prestarlle terceiras persoas".

O Alto Tribunal galego entende, ao contrario que a Audiencia Provincial, que A. M. R., "ao ver que amigos e coñecidos seus estaban a agredir á vítima, se situou no punto inicial da agresión, sen agredila".

O mozo, segundo consta na sentenza, "atopábase totalmente indefenso e desvalido debido ao elevado número de persoas que o agredían e rodeaban, entre as que se atopaban Diego Montaña, Alejandro Freire 'Yumba' e Kaio Amaral, e debido á continuidade dos golpes recibidos, sen ser capaz de facer ningún acto hostil contra eles, nin contra o resto do grupo agresor".

Os xuíces relatan que, "nun momento dado, e a duras penas, logrou incorporarse e tentou abandonar o lugar, pois dous cidadáns senegaleses trataron de axudarlle e de afastalo dos seus agresores, sendo perseguidos uns 150 metros polo grupo agresor".

O TSXG entende probado que Diego Montaña, Alejandro Freire e Kaio Amaral, como membros do grupo agresor, interviñeron "activamente na persecución, propinando golpes e impedindo a defensa e fuxida da vítima".

A. M. R., segundo sinalan na sentenza, "resultou empuxado por un dos cidadáns senegaleses, sen que conste se a súa intención era separar ou participar na agresión".

Finalmente, á altura dunha rotonda, o mozo "caeu o chan esborrallado e inconsciente, momento en que Diego Montaña, Alejandro Freire, Kaio Amaral Silva, A. M. R. e os demais membros do grupo se dispersaron por diversas rúas".